Գյուղատնտեսության ոլորտում Հայաստանի եւ Իսրայելի միջեւ առկա է չիրացված մեծ ներուժ, որն օգտագործելու դեպքում հնարավոր կդառնա հասնել մեծ արդյունքների: Այս մասին, այսօր՝ մարտի 14-ին, Երեւանում, Իսրայելի գյուղատնտեսության եւ գյուղի նախարարության ներդրումների ֆինանսավորման վարչության որակի կառավարման եւ տնտեսական հարցերով տնօրեն Եֆրաթ Հադասի եւ «ԲԻՆԱ» խորհրդատվական ընկերության ներկայացուցիչ Յոավ Գալի հետ հանդիպման ժամանակ նշել է ՀՀ գյուղատնտեսության նախարար Սերգո Կարապետյանը:
Գյուղնախից NEWS.am-ին հայտնում են, որ պատվիրակությունը Երեւանում մարտի 14-19-ը կանցկացնի «Գյուղատնտեսական քաղաքականություն» թեմայով դասընթաց, որը կազմակերպվել է ԱՄՆ Միջազգային զարգացման գործակալության կողմից ֆինանսավորվող եւ «Ագրոբիզնեսի եւ գյուղի զարգացման կենտրոն» (CARD) հիմնադրամի ու «ԱՎԱԳ Սոլյուշնս» ՍՊԸ-ի համատեղ իրականացվող «Հայաստանի գյուղատնտեսական քաղաքականության ռազմավարություն եւ գործողությունների ծրագրի» շրջանակում:
«Իսրայելի հարուստ փորձը գյուղատնտեսության ոլորտի զարգացման բնագավառում, որը հիմնված է գիտական վերջին նորարարությունների վրա, չափազանց կարեւոր է մեր երկրի համար: Համոզված եմ, որ այս դասընթացը շատ հետաքրքիր եւ օգտակար կլինի բոլոր մասնակիցների համար», - ողջունելով հյուրերին` նշել է ՀՀ գյուղատնտեսության նախարար Սերգո Կարապետյանը:
Բարձր գնահատելով հայ-իսրայելական համագործակցությունը գյուղատնտեսության ոլորտում` նախարարը միաժամանակ շեշտել է, որ այս բնագավառում երկու երկրների միջեւ առկա է չիրացված մեծ ներուժ, որն օգտագործելու դեպքում հնարավոր կդառնա հասնել մեծ արդյունքների:
Հանդիպման մասնակիցները նախարարին համառոտ ներկայացրել են դասընթացի հիմնական թեմաներն ու մեթոդաբանությունը եւ ընդգծել, որ հիմնական շեշտը դրվելու է գյուղատնտեսության քաղաքականությունը ու գործնականում դրա կիրառումը առավելագույնս միմյանց մոտեցնելու սկզբունքի վրա:
Վստահություն հայտնելով, որ նման դասախոսությունները շարունակական բնույթ կկրեն եւ կընդգրկեն շահագրգռված անձանց լայն շրջանակ` նախարարը հաջողություններ եւ արդյունավետ աշխատանք է մաղթել դասընթացի մասնակիցներին:
Դասընթացներից բացի ծրագրի շրջանակում նախատեսվում է խորհրդատվություն եւ աջակցություն տրամադրել ՀՀ գյուղատնտեսության նախարարությանը քաղաքականության մշակման, արժեշղթաների զարգացման եւ այլ ոլորտներում, ինչպես նաեւ կազմակերպել սեմինարներ ու հանդիպումներ համապատասխան ստորաբաժանումների ղեկավարների հետ:
