«Ուլիս-Երեւան» ֆուտբոլային ակումբի գլխավոր մարզիչ, խաղադրույք կատարելու միջոցով ապօրինի շահույթ ստանալու մեջ մեղադրվող Գագիկ Սիմոնյանի կալանքի ժամկետը 2 ամսով երկարաձգվել է: Այս մասին NEWS.am-ի թղթակցի հետ զրույցում ասաց Սիմոնյանի փաստաբան Լեւոն Բաղդասարյանը:
«Նախաքննությունը շարունակվում է: Պատրաստվում եմ միջնորդություն ներկայացրել, որը կապված է իմ պաշտպանյալի տված ցուցմունքի հետ: Գագիկ Սիմոնյանը հայտարարել է, որ ինքը ոչ կաշառք է ստացել, ոչ էլ պահանջել է, ես պատրաստվում եմ սրա վերաբերյալ դիրքորոշում հայտնել»,- ասաց Լեւոն Բաղդասարյանը:
Փաստաբանի խոսքով՝ այս գործով քննչական որեւէ գործողություն չի կատարվում:
Ավելի վաղ ԱԱԾ-ն հաղորդել էր, որ 2015 թ. նոյեմբերին հայկական Ֆուտբոլային «Ուլիս Երեւան» ակումբի գլխավոր մարզիչ Գագիկ Սիմոնյանը, ֆուտբոլիստ (պաշտպան) Հայկ Հունանյանը, «Ուլիս 2» ակումբի ադմինիստրատոր Արա Ազարյանը եւ մարզչի օգնական Ռուբեն Առուշանյանը հանցավոր համաձայնությամբ, «Տոտո» բուքմեյքերական գրասենյակի աշխատակցի միջոցով, կատարել են 1000-3000 ԱՄՆ դոլար խաղադրույքներ եւ ապահովելով խաղերի կանխատեսելի արդյունքները, ստացել են ապօրինի շահույթ, որը համապատասխան մասնաբաժիններով բաշխվել է վերը նշված անձանց եւ առանձին ֆուտբոլիստների միջեւ:
«Ուլիս Երեւան» ակումբի գլխավոր մարզիչ Գագիկ Սիմոնյանը եւ ադմինիստրատոր Արա Ազարյանը կալանավորված են: Հունվարի 13-ին կալանավորվել են նաեւ մարզչի օգնական Ռուբեն Առուշանյանը եւ ֆուտբոլիստ Հայկ Հունանյանը:
