Ասել, թե Հայաստանի ու Վրաստանի միջեւ հարաբերությունները բարիդրացիական են՝ նշանակում է ոչինչ չասել: Նման տեսակետ է հայտնել Հայաստանի ԱԳՆ ղեկավար Էդվարդ Նալբանդյանը մարտի 25-ին Երեւանում Վրաստանի ԱԳՆ ղեկավար Միխեիլ Ջանելիձեի հետ մամուլի ասուլիսի ժամանակ:
ՀՀ ԱԳՆ ղեկավարի խոսքով երկու ժողովուրդների միջեւ սերտ կապեր կան ու դրանք պատահական չեն, քանի որ նրանք հազարամյակներ շարունակ ապրել են կողք կողքի: «Դրանց հիմքում փոխադարձ հարգանքն ու ժամանակով ստուգված փոխադարձ վերաբերմունքն է»,- նշել է Նալբանդյանը՝ հավելելով որ այդ հարաբերություններն ընդլայնվում ու խորանում են:
«Նույն տարածաշրջանում գտնվող երկու երկրների արտգործնախարարների համար օգտակար է ժամանակ առ ժամանակ տեսակետներ փոխանակելը: Ինչ վերաբերում է երկկողմանի հարաբերություններին, ապա Հայաստանի ու Վրաստանի միջեւ չկան այնպիսի խնդիրներ, որոնք հնարավոր չէ լուծել համատեղ ջանքերով»,- նշել է նախարարը: Նրա խոսքով, բանակցությունների ընթացքում քննարկվել են նախագահների միջեւ պայմանավորվածությունների կատարումը, երկկողմանի հարաբերությունների ընդարձակ օրակարգը: Նախարարը նշել է, որ երկրների միջեւ ավելի քան 80 կնքված համաձայնագիր կա, որոնք վերաբերում են բոլոր ոլորտներին, պայմանագրային – իրավական հարուստ դաշտ կա: Կողմերը պայմանավորվել են աշխուժացնել արտգործնախարարությունների միջեւ կապերը, տեսակետներ փոխանակել միջկառավարական հանձնաժողովների աշխատանքի մասին: Այս հարցը կքննարկվի վարչապետ Հովիկ Աբրահամյանի հետ հանդիպման ընթացքում:
Կողմերը նաեւ քննարկել են տրանսպորտային ենթակառուցվածքների զարգացումը, էներգետիկայի ու զբոսաշրջության ոլորտում համագործակցությունը: Շարունակվում է համագործակցությունը նաեւ հայերի մշակութային ժառանգության պահպանման գործում: Նալբանդյանը նշել է, որ գործընկերոջը տեղեկացրել է Լեռնային Ղարաբաղի հակամարտության կարգավորման գործընթացում վերջին զարգացումների մասին:
«Սա առաջին բարձրաստիճան օտարերկրյա հյուրն է ՀՀ ԱԳՆ նոր շենքում: Հաճելի է այս պահը կիսել բարեկամական երկրից իմ գործընկերոջ հետ»,- շեշտել է Էդվարդ Նալբանդյանը:
