Թուրքիայի Դիարբեքիրի Սուրի շրջանի նախկին քաղաքապետ Աբդուլլահ Դեմիրբաշի դեմ մի շարք հետաքննություններ են սկսվել։
Թուրքական Cumhuriyet-ի փոխանցմամբ՝ 2 անգամ քաղաքապետի պաշտոնը զբաղցենելուց հետո ուսուցչի աշխատանքին վերադարձած Աբդուլլահ Դեմիրբաշի դեմ մի քանի հետաքննություն է սկսվել, որոնցից մեկը վերաբերվում է 2015-ի օգոստոսին Հայաստան կատարած այցին։ Հետաքննության մեջ նշվել է, թե լինելով դպրոցի ուսուցիչ, Աբդուլլահ Դեմիրբաշը պարտավոր էր Հայաստան այցի եւ բարձրաստիճան պաշտոնյայի հետ հանդիպելու մասին տեղեկացներ դպրոցի տնօրինությանը։
Պաշտպանական ճառում Աբդուլլահ Դեմիրբաշը վկայակոչել է ճամփորդելու ազատությունն ու մարդու իրավունքները՝ շեշտելով, որ ամառային արձակուրդներին ինքը կարող է մեկնել ցանկացած երկիր։ «Իսկ Հայաստանի հանրապետության նախագահի հետ հանդիպելը երբեք Թուրքիայի հանրապետության օրենքներով կամ քաղաքացիական ծառայողների կանոններով հանցանք չի համարվում»,-ասել է Աբդուլլահ Դեմիրբաշը։
Նշենք, որ Սուրի նախկին քաղաքապետ Աբդուլլահ Դեմիրբաշը հայերենով ցուցանակ է տեղադրել Դիարբեքիրի մուտքի մոտ՝ «Բարով եկաք» գրությամբ, հրատարակել Հովհաննես Թումանյանի հեքիաթները հայերենով, Դիարբեքիրում կազմակերպել հայերենի ուսուցման դասընթացներ, Թուրքիայում Հայոց ցեղասպանության զոհերին նվիրված առաջին հուշարձանը տեղադրել ու աջակցել Դիարբեքիրի հայկական Սուրբ Կիրակոս եկեղեցու վերանորոգմանն ու հետագայում նաեւ պահպանմանը։
