Ուտելիքը տարբերակող սարքի (WearSens վզնոց) հիմնադիրները, Քալիֆորնիայի համալսարանի Լոս Անջելեսի մասնաճյուղի (UCLA) թիմը մտադիր է առաջիկայում դիալեզ ստացող մարդկանց համար նոր հավելված ստեղծել: Թիմում ներգրավված է նաեւ հայ ծրագրավորող Հայկ Քալանթարյանը, որը 4 տարեկանից բնակվում է Միացյալ Նահանգներում:
«Այժմ հետազոտում ենք, թե կլինիկական ինչ հավելվածներ կարող ենք ստեղծել: Դրանցից մեկը, օրինակ, մշտադիտարկում է դիալիզ ստացող հիվանդին, որին անհրաժեշտ է կանոնակարգել օգտագործվող հեղուկի քանակը: Հավելվածը կարող է օգտակար լինել նաեւ տարեց մարդկանց համար, որոնց օրգանիզմն արագ ջրազրկվում է: Կարծում եմ՝ արդեն տարեվերջ մենք կիրարկումը կտեսնենք այդ հավելվածի»,- NEWS.am-ի թղթակցի հետ զրույցում Հայկ Քալանթարյանը:
26-ամյա Հայկն իր առաջին քայլերն արել է մի քանի տարի առաջ. նա ծրագրավորել է WearSens վզնոցը, որը դրական արձագանք գտավ աշխարհում: Նշենք, որ ուտելու ժամանակ վզնոցը տեղեկատվություն է ստանում ուտելիքի մասին եւ այն փոխանցում բջջային հեռախոսին: Ի դեպ, այս սարքն ուղղված է մարդկանց առողջության պահպանմանը:
«Ի տարբերություն մյուս ոլորտների՝ ինֆորմատիկան համեմատաբար նոր է եւ արագ զարգացող: Որպես կանոն, այն մեծ հնարավորություններ է տալիս նորարարության համար: Աշխատանքային շուկան էլ մեծ է, հատկապես Քալիֆորնիայում»,- ասաց Հայկը, որն այժմ սովորում է UCLA-ում եւ առաջիկա ամիսներին կդառնա գիտությունների թեկնածու:
Նշենք, որ Հայկ Քալանթարյանը հայտնի ծրագրավորող Արտակ Քալանթարյանի որդին է, գրող- հրապարակախոս, դրամատուրգ Արտաշես Քալանթարյանի թոռը: Քալանթարյանների ընտանիքն ԱՄՆ է տեղափոխվել 1993թ.-ին: Քալանթարյան ամուսինները 2000-ական թվականներին աշխատել են Մայրքրոսոֆթում, ապա հիմնել իրենց սեփական IT ընկերությունը:
