Միջազգային միջնորդների առաքելությունը պիտի ուշադրություն դարձնի Լեռնային Ղարաբաղում իրավիճակի սրմանը եւ կարճ ժամկետում հասնի կրակի դադարեցման: Այդ մասին լրագրողներին հայտնել է ՌԴ Դաշնության խորհրդի պաշտպանության եւ անվտանգության կոմիտեի փոխնախագահ Ֆրանց Կլինցեւիչը, հայտնում է ՏԱՍՍ-ը:
Այժմ պետք չէ փնտրել ղարաբաղյան հակամարտության սրման համար մեղավորին, կարծում է Կլինցեւիչը: «Այժմ գերայժմեականը սկզբունքորեն այլ խնդիր է. կարճագույն ժամկետում հասնել կրակի դադարեցման», - վստահ է սենատորը: Նա նաեւ նշել է, որ «այստեղ դժվար կլինի որեւէ բան անել առանց մի շարք օտարերկրյա պետությունների, նախ եւ առաջ` Ռուսաստանի միջնորդական առաքելության» եւ հիշեցրել է, որ ՌԴ-ն «ԱՄՆ-ի եւ Ֆրանսիայի հետ ղարաբաղյան հակամարտության կարգավորման ԵԱՀԿ Մինսկի խմբի անդամ է»:
Խորհրդարանականը զգուշացրել է 1990-նների իրավիճակին վերադարձից, «երբ տարբեր տվյալների համաձայն, կողմերի միջեւ զինված բախումների ընթացքում մինչեւ 25 հազար մարդ զոհվեց» եւ ընդգծել է, որ ցանկացած, նույնիսկ հնացած հակամարտություն կարող է լուծվել միայն բանակցությունների ճանապարհով: Կլինցեւիչը նաեւ մեջբերել է Սիրիայի օրինակը, որի «փորձը ցույց է տալիս, որ բանակցային գործընթացը ոչ մի խելամիտ այլընտրանք չունի»: