Վալերի Պերմյակովն այսօր՝ ապրիլի 8-ին, մանրամասն ուսումնասիրում էր, թե ինչպես է 2015թ. հունվարի 12-ին, դաժանաբար սպանել Ավետիսյաններին:
NEWS.am-ի թղթակիցը հաղորդում է, որ Գյումրիում տեղակայված ռուսական 102-րդ ռազմաբազայում կայացած դատական նիստում առաջին անգամ հրապարակվել է Ավետիսյանների ընտանիքի սպանությունից հետո կատարած դեպքի վայրի զննության տեսագրությունը:
Պերմյակովը դիտում էր տեսագրությունն՝ առանց աչքը թարթելու: Նույնիսկ երբ ցուցադրում էին սպանված փոքրիկ Հասմիկի ու վիրավոր 6-ամսյա Սերյոժայի կադրերը, Պերմյակովը միմիկան էլ չփոխեց: Նշենք, որ կադրերի հրապարակման ժամանակ սպանված Հասմիկ Ավետիսյանը քրոջ ինքնազգացողությունը վատացավ. նրան դատարանի դահլիճից դուրս բերեցին հարազատները, ապա նիստը շարունակվեց:
Տուժողի իրավահաջորդի ներկայացուցիչ, փաստաբան Լուսինե Սահակյանը կրկին միջնորդեց դատարան հրավիրել գործով երկու կարեւորագույն վկաների՝ Պերմյակովի անմիջական ղեկավար Նիկիշինին եւ Տարասովին: Նշենք, որ մինչ այդ դատարանը հայտնեց, որ Նիկիշինը հեռացվել է աշխատանքից եւ նրա գործերն ուղարկվել են զինկոմիսարիատ, իսկ Տարասովն էլ տեղափոխվել է այլ զորամաս: Լուսինե Սահակյանի պնդմամբ, պետք է ծանուցել վկաներին եւ հրավիրել դատարան՝ ցուցմունք տալու:
Դատարանն այսօր բավարարեց տուժող կողմի իրավահաջորդների միջնորդությունը, որով պահանջում էին ռուսական կողմից ճշտել՝ արդյոք սատանիզմի հետ կապված այլ անձինք հարցաքննվել են եւ ինչ նյութեր են առկա ռուսական կողմի մոտ: Հիշեցնենք, որ դեռեւս առաջին դատական նիստին փաստաբանները հայտարարել էին, որ ամբաստանյալը սատանիստ է եւ պահանջել էին այս ուղղությամբ կատարված նյութերը վերցնել ռուսական կողմից:
Դատական նիստը հետաձգվեց եւ նշանակվեց ապրիլի 15-ին:
Նիստից հետո Լուսինե Սահակյանը լրագրողների հետ զրույցում նշեց, որ Վալերի Պերմյակովը կարծես թե հաճույքով էր դիտում ամբողջ տեսագրությունը։
Հիշեցնենք, որ Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Դատարանի վճռով նիստն ընթանալու է ուրբաթ օրերին:
Վալերի Պերմյակովն իրեն մեղավոր է ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանություն, ավազակություն եւ Հայաստանի պետական սահմանը հատելու փորձ: