Ադրբեջանը թույլ չի տվել ԵԱՀԿ-ին շփման գծում դիտարկում անցկացնել:
NEWS.am-ի թղթակցի հետ զրույցում ԼՂՀ արտաքին գործերի նախարարության մամուլի խոսնակ Անի Սարգսյանը, անդրադառնալով ԵԱՀԿ-ի կողմից նախատեսված դիտարկմանը, հայտարարել է. «Մենք արդեն ապրիլի 6-ին հայտարարել ենք, որ ԵԱՀԿ գործող նախագահի անձնական ներկայացուցչի գրասենյակը դիմել է ղարաբաղյան կողմին՝ խնդրելով աջակցել ԼՂՀ-ի եւ Ադրբեջանի զինված ուժերի շփման գծում, մասնավորապես ԼՂՀ Մարտակերտի շրջանի Սեյսուլան գյուղի ուղղությամբ դիտարկում անցկացնելուն:
ԼՂՀ իշխանությունները անմիջապես տվել են իրենց համաձայնությունը եւ հաստատել իրենց պատրաստակամությունը՝ ձեռնարկել բոլոր անհրաժեշտ միջոցները դիտարկման մասնակիցների անվտանգությունն ապահովելու համար: Շփման գծում դիտարկում անցկացվում է միայն երկու կողմերի՝ ԼՂՀ-ի եւ Ադրբեջանի, համաձայնության եւ անվտանգության երաշխիքների դեպքում: Մենք մինչեւ այս պահը տեղեկություն չունենք ադրբեջանական կողմի դրական պատասխանի մասին»: