Ներդրումային գրավչության համար Հայաաստանը պետք է հարաբերություններ հարթի իր հարեւանների հետ: Այս մասին ապրիլի 12-ին հայտնել է Հայաստանում Գերմանիայի արտակարգ ու լիազոր դեսպան Մաթիաս Քիսլերը Հայաստանում Գերմանական տնտեսական միության ներկայացուցչության բացման շրջանակում ՀՀ էկոնոմիկայի նախարար Արծվիկ Մինասյանի հետ համատեղ մամուլի ասուլիսի ժամանակ:
«Երկու երկրների համագործակցության համար կան լավ հնարավորություններ տարբեր ոլորտներում: Բայց պետք է նշեմ, որ Հայաստանի մեկուսացած դիրքը խնդիրներ է ստեղծում մանավանդ օտարերկրյա ներդրողների համար: Դրա համար էլ ցանկալի է, որ Հայաստանը լավ հարաբերություններ ունենա բոլոր հարեւանների հետ»,- ասել է նա:
Ի պատասխան նախարար Մինասյանը ասել է.«Հարեւաններին չեն ընտրում, բայց մեր տնտեսությունը պետք է ուժեղ լինի, որպեսզի եթե որեւէ պետություն որոշի մեզ թշնամական դառնալ, նա նույնիսկ չհամարձակվի մտածել ագրեսիայի մասին»:
