Հայաստանի ԱԳ նախարար Էդվարդ Նալբանդյանը պարզաբանել է, թե ներկայում ղարաբաղյան հակամարտության կարգավորման հարցով բանակցությունների սեղանին ինչ փաստաթուղթ կա:
Հանրային հեռուստաալիքին տված հարցազրույցում նախարարը նշել է, որ աշխատանքային փաստաթուղթ են համարվում նրանք, որոնք կողմերի դիտարկման առարկա են եղել: Այն փաստաթղթերը, որոնց շուրջ առաջընթաց գրանցել չի հաջողվել, ուղարկվում են Վիեննայում ԵԱՀԿ-ի կենտրոնական գրասենյակ՝ պահպանության:
Նալբանդյանը նաեւ նշել է, որ տարբեր գաղափարներ կան, բայց կարիք չկա հեծանիվ հորինել, կարեւորը, որ Ղարաբաղը երբեք չի կարող լինել Ադրբեջանի կազմում: Այդ գաղափարը կարմիր թելի նման անցնում է բոլոր փաստաթղթերում:
Պատասխանելով հարցին, թե որքանո՞վ է նպատակահարմար շարունակել բանակցությունները, երբ կողմերից մեկը փորձում է դրանք ֆարսի վերածել, նախարարը հիշեցրել է, որ միջազգային հանրությունը կոչ է անում վերադառնալ բանակցությունների սեղանի շուրջ: «Ո՛չ պատերազմը, ո՛չ պատերազմական գործողությունները չեն կարող լուծել խնդիրը: Պատմությունը վկայում է, որ պատերազմից հետո կողմերը, երբեմն վատթարացնելով դիրքերը, վերադառնում են բանակցությունների սեղանի շուրջ: Կարծում եմ՝ ոչ ոքի նոր պատերազմ պետք չէ: Հարկավոր է փորձել բանակցությունների միջոցով կարգավորման ուղի գտնել»,- նշել է նախարարը:
