Հայաստանում հնարավոր է հակառակորդի անօդաչու թռչող սարքերին հակազդող սեփական սարքերն արտադրել, բայց պետք է հասկանալ, որ դա տարիների, այլ ոչ թե ամիսների գործ է: Այս մասին «Մեդիամաքսին» տված հարցազրույցում նշել է Իլինոյսի համալսարանին կից Խելացի ռոբոտատեխնիկայի լաբորատորիայի (Intelligent Robotics Lab) տնօրեն Նաիրա Հովակիմյանը:
Հարցին, թե արդյոք Հայաստանը շանս ունի այդ նորագույն սարքավորումները եւ զենքերը նախագծել ու արտադրել Հայաստանում, նա պատասխանել է. «Կարծում եմ, կան մարդիկ, որոնք կարող են քայլեր ձեռնարկել եւ ինչ-որ չափով լուծել այդ խնդիրը, բայց կան մարդկային եւ ֆինանսական ռեսուրսների հարցեր։ Այսօր Հայաստանում, ինչպես շատ է պատահել մեր պատմության ընթացքում, մարդկային ռեսուրսի պակաս կա, ինչի պատճառով մենք աշխարհում չենք կարողանում անել այն, ինչն անում են, օրինակ, հրեա մասնագետներն ու գիտնականները։
Հայաստանում մի քանի ընկերություններ եմ տեսել, որոնք զբաղվում են նման գործով, բայց, կրկնեմ, ռեսուրսների եւ ժամանակի խնդիր կա: Պետք է հասկանալ, որ անգամ եթե այդ աշխատանքները ճիշտ ձեւով կազմակերպվեն, արդյունքը շատ արագ տեսանելի չի լինի»:
Նրա խոսքով, շատ կարեւոր է նաեւ լուծել մասնագետներին դրսում վերապատրաստելու հարցը. հայ գիտնականներին պետք է հնարավորություն ընձեռել մեկնել կոնֆերանսների եւ համագործակցել արտերկրի գիտնականների հետ, որպեսզի գիտություն-կիրառություն կապը շատերի համար հասկանալի դառնա: «Հայաստանում պետք է գիտության ֆինանսավորում ապահովել լուրջ մակարդակի վրա, հրավիրել դրսի լուրջ մասնագետների, որոնք տեղում կիսեն իրենց փորձը, փորձի փոխանակման ծրագիր է պետք մշակել եւ իրականացնել»,-նշել է Հովակիմյանը:
Նա կարծիք է հայտնել, որ անօդաչու թռչող սարքերով զբաղվող մասնագիտական խումբ ձեւավորելու եւ դրանում Հայաստանի եւ այլ երկրներում աշխատող հայերին ներգրավվելու գաղափարը կարող է արդարացված լինել:
հարցին, թե իրատեսակա՞ն է ակնկալել, որ Հայաստանը կկարողանա ԱԹՍ-ի սեփական արտադրությունը ծավալել, Նաիրա Հովակիմյանը պատասխանել է. «Դա հնարավոր է, բայց պետք է հասկանալ, որ դա տարիների, այլ ոչ թե ամիսների գործ է: Այդտեղ անհնարին բան չեմ տեսնում»:
Առավել մանրամասն սկզբնաղբյուր կայքում
