Ճապոնական Mitsubishi Motors ավտոընկերությունը խոստովանել է, որ դիտավորյալ նվազեցրել է Ճապոնիայում վաճառվող փոքրալիտրաժ ավտոմեքենաներում վառելիքի ծախսի ցուցանիշները: Այդ մասին հայտնում է «Ինտերֆաքսը»` վկայակոչելով ընկերության մամուլի հաղորդագրությունը:
Mitsubishi-ում պատշաճ եղանակով թեստեր չեն իրականացրել վառելիքի ծախսի վերաբերյալ եւ կեղծ տեղեկություններ են ուղարկել Ճապոնիայի հողի, ենթակառուցվածքների, տրանսպորտի եւ զբոսաշրջության նախարարություն:
Մասնավորապես, թեստավորման ընթացքում ընկերության ներկայացուցիչները շարժմանը դիմադրության ավելի ցածր ցուցանիշ են օգտագործել, քան պահանջվում էր: Բացի այդ, թեստավորման մեթոդները չեն համապատասխանել ճապոնական օրենսդրության պահանջներին:
Ճշտել են, որ խախտումները վերաբերում են չորս փոքրալիտրաժ մոդելի համապատասխանող 625 հազար մեքենայի, ներառյալ eK Wagon-ը եւ eK Space-ը, ինչպես նաեւ Dayz եւ Dayz Roox մոդելներին, որոնք Mitsubishi-ն արտադրել է Nissan-ի համար:
Mitsubishi-ն եւ Nissan-ը դադարեցրել են վերոհիշյալ մեքենաների վաճառքը, ընկերությունները քննարկում են խախտումների համար փոխհատուցման պայմանները: Բացի այդ, Mitsubishi-ն նախատեսել է խախտումների հետաքննության հատուկ հանձնաժողով ստեղծել, որը կազմված կլինի կողմնակի փորձագետներից: Ընկերությունում սկսել են ստուգել նաեւ արտահանման համար արտադրվող մեքենաների համար վառելիքի ծախսը: