Ղարաբաղյան հակամարտության շփման գոտում Ադրբեջանի գործողությունները Ֆրանսիայում եւ Բելգիայում իսլամիստների գործողությունների համանմանությունն են։ Այս մասին ապրիլի 21-ին՝ մամուլի ասուլիսի ժամանակ, ասել է ազգությամբ եզդի իրաքցի իրավաբան Ադման էլ Էզդինը, որն այս պահին ապրում է Գերմանիայում։
Թուրքիայի եւ Իրաքի եզդի հասարակական գործիչները Եզդիների ազգային միության նախագահ Խըդըր Աջոյանի հետ մեկ րոպե լռությամբ հարգել են 1915թ. Հայոց ցեղասպանության զոհերի, 2014թ. օգոստոսին եզդիների ցեղասպանության եւ Ադրբեջանի ապրիլյան ագրեսիայի հետեւանքով զոհվածների հիշատակը։
Հայաստան գալու պատճառների թվում Էլ Էզդինն առանձնացնում է երկու կարեւոր գործոն. «Առաջին հերթին մենք ուզում ենք ցուցադրել, որ ողջ աշխարհի եզդիները կանգնած են եղբայրական հայ ժողովրդի կողքին հատկապես Ադրբեջանի կողմից հայկական հողերի վրա հարձակվելու պահին։ Մենք եղել ենք զոհված եզդի զինծառայողների տներում։ Երկրորդ հերթին մենք ցանկանում ենք երախտագիտություն հայտնել հայկական պետությանը եզդիներին՝ որպես ազգ, նրանց կրոնն ու լեզուն ճանաչելու համար»,- ասել է եզդի իրավաբանը։
