Ավտոմոբիլաշինական General Motors կորպորացիան որոշել է Հյուսիսային Ամերիկայում իր չորս ձեռնարկություններում դադարեցնել արտադրությունը, պատճառն այն է, որ Ճապոնիայում Կյուսյու ռեգիոնում մի շարք երկրաշարժներից հետո անհրաժեշտ ավտոպահեստամասերի պակաս է առաջացել:
Հայտարարության մեջ ասված է, որ ընկերությունը որոշել է երկու շաբաթով դադարեցնել Օհայո, Քանզաս ու Թենեսի նահանգներում նաեւ Կանադայում գտնվող ձեռնարկությունների աշխատանքը: Ձեռնարկությունների աշխատանքը կդադարեցվի ապրիլի 25-ին:
Միեւնույն ժամանակ ընկերությունից հայտնել են, որ նման ժամանակավոր դադարեցումը չի ազդի արտադրության տարեկան պլանի կամ ֆինանսական ցուցանիշների վրա, հայտնում է «ՌԲԿ»-ն:
Ճապոնիայի հարավ- արեւմուտքում ապրիլի 14-16-ը մի շարք երկրաշարժեր են գրանցվել: Մի քանի հարյուր ստորգետնյա ցնցումների հետեւանքով, որոնցից ամենաուժեղը 7.3 մագնիտուդով էր, մոտավորապես երկու հազար մարդ վիրավորում ու վնասվածքներ է ստացել, զոհվածների թիվը, տարբեր գնահատականներով 50-ի է հասել: