Ցեղասպանության ճանաչումն արդարության հասնելու հիմնական միջոցն է: Այս մասին այսօր՝ ապրիլի 23-ին, Երեւանում ընթացող «Ընդդեմ ցեղասպանության հանցագործության» գլոբալ ֆորումի ժամանակ լրագրողների հետ զրույցում ասել է Կանադայի Մանիտոբայի համալսարանի Ցեղասպանության հետազոտողների միջազգային ասոցիացիայի նախագահ Էնդրյու Վուլֆորդը՝ պատասխանելով հարցին, թե ինչով է կարեւոր ցեղասպանությունների ճանաչումը:
«Չճանաչացվածությունն այլ քայլեր է առաջացնում. ցավը, որ չի ճանաչվել Ցեղասպանությունը, ավելի մեծ ցավ է պատճառում: Ըստ իս, սա արդարության հասնելու հիմնական միջոցն է»,- ասել է Էնդրյու Վուլֆորդը:
Գիտնականի խոսքով, իրենց ասոցացիան քննադատում է բոլոր այն գիտնականներին, որոնք ժխտում են այն, ինչ տեղի է ունեցել. «Մեր ընդունած բանաձեւի համաձայն, Ցեղասպանությունը ժխտող գիտնականները գիտական որեւէ հենք չունեն: Մեր ասոցացիայի նպատակն է ապահովել, խրախուսել գիտական ցանցի ստեղծումը, որը կարող է հետագայում որակյալ ուսումնասիրություն կատարել ցեղասպանությունների վերաբերյալ»:
