Ցանկալի կլիներ, որ Օբաման արտասաներ «ցեղասպանություն» բառը, բայց նա իր խոսքում ուղղակիորեն մատնանշում է ցեղասպանության հանցագործության տարրերը: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում, լրագրողների հետ զրույցում նշել է Կառավարության աշխատակազմի ղեկավար- նախարար Դավիթ Հարությունյանը:
«ԱՄՆ նախագահ Բարաք Օբաման մասնագիտությամբ իրավաբան է, եւ եթե ուշադիր լինեք, թե նա ինչ ձեւակերպումներ է օգտագործում արդեն երրորդ տարին շարունակ, կհասկանաք, որ նա ուղղակիորեն մատնաանշում է ցեղասպանության հանցագործության տարրերը: Այսինքն, այն, ինչ միջազգային փաստաթղթերում անվանվում է «ցեղասպանություն», նա դրա բովանդակությունն արտաբերում է իր ելույթում»,-ասաց Հարությունյանն ու հավելեց, որ այս տեսանկյունից մենք պետք է հակառակ քայլը կատարենք եւ նաեւ մեր շնորհակալությունը պիտի հայտնենք, որ մարդը փաստացի դա անվանում է ցեղասպանություն: