Ամերիկացի երգիչ Փրինսի մարմինը դիակիզել են: Հրաժեշտի մասնավոր արարողությունը տեղի է ունեցել նրա ընտանիքի անդամների, ընկերների եւ երաժշտական բիզնեսում գործընկերների շրջանակում:
Չի հաղորդվում, թե ճշգրիտ որտեղ է տեղի ունեցել արարողությունը, սակայն նրա մի շարք ընկերների եւ ազգականների նկատել են Միննեապոսլիսի արվարձանում երաժշտին պատկանող Paisley Park համալիր մտնելիս, հայտնում է Lenta-ն` վկայակոչելով ABC News-ին: Նրա հարյուրավոր երկրպագուներ պարսպին ծաղիկների, հիշատակի հուշանվերներ եւ մանուշակագույն փուչիկներ են ամրացրել:
Փրինսի մարմինը հայտնաբերել էին ապրիլի 21-ին, Paisley Park համալիրի շենքի վերելակում: Երաժիշտը 57 տարեկան էր: Նշվում է, որ մահից կարճ ժամանակ առաջ, նա գրիպի ծանր տեսակով էր հիվանդացել: ԶԼՄ-ները նաեւ հաղորդել են, որ մահից վեց օր առաջ Փրինսին բուժել են թմրանյութի չափազանց մեծ չափաբաժին ընդունելուց: Արետտա Ֆրանկլինը ենթադրել է, թե Փրինսը կարող էր վարակված լինել Զիկա վիրուսով:
Մահվան ճշգրիտ պատճառն առայժմ չի պարզվել, դատաբժշկական փորձաքննության արդյունքները կներկայացվեն չորս շաբաթից:
2005-ին Փրինսի անունը մտցվել էր ռոքնռոլի փառքի սրահ: Նրա ամենահայտնի սկավառակը համարվում է Purple Rain-ը (1984 թ), այն կանոնավոր կերպով ընդգրկվում է ռոքնռոլի ժամանակաշրջանի լավագույն ալբոմների ցուցակներում: Երգիչը «Գրեմմի», «Օսկար» եւ «Ոսկե գլոբուս» մրցանակների մրցանակակիր էր:
