Ապրիլյան պատերազմի 4 օրը ցույց տվեց, որ ցեղասպանությունը թուրք ժողովրդի գենետիկ հատկանիշն է, որ կարողանում են մարդու գլուխը, ականջը կտրել, խոշտանգել մարմինները, հստակ կարող եմ ասել, որ սա թուրքական ձեռագիրն է: Այս մասին այսօր Ծիծեռնակաբերդում NEWS.am-ի հետ զրույցում ասել է թուրք իրավապաշտպան Մահմուդ Ուզունը:
Նա նշել էր, որ «Ընդդեմ ցեղասպանության միավորում» կազմակերպության ներկայացուցիչ է: Ամեն տարի ապրիլի 24-ին գալիս է Երեւան՝ ներկա գտնվելու Ծիծեռնակաբերդում եւ ներողություն խնդրելու հայ ժողովրդից, որ իր ազգը նման վայրագություն է կատարել հայ ժողովրդի նկատմամբ:
«Թուրքական մի շարք հասարակական կազմակերպություններ արդարության կողմն են եւ ուզում են, որ Հայոց ցեղասպանությունը ճանաչվի, դատապարտվի եւ փոխհատուցվի: Նրանք կանգնած են հայերի կողքին, պայքարում են, որպեսզի թուրք հասարակության գիտակցությունը հասնի այն մակարդակին, որպեսզի հայկական հարցը ճանաչեն: Թուրքիայում հասարակության շատ քիչ մասը արդեն առերեսվում է իրական պատմության հետ, ճանաչում է Հայոց ցեղասպանությունը, սակայն Թուրքիայի իշխանությունները շարունակում են իրենց ժխտողական քաղաքականությունը»:
Իրավապաշտպանն ասել է, որ երկար տարիներ Թուրքիայում եղել է քաղբանտարկյալ եւ 20 տարի է՝ ապրում է Լոնդոնում:
Նշել է, որ այս տարի Հայաստան է եկել նաեւ աշխարհից պահանջելու Արցախի ինքորոշման ճանաչումը:
Հարցին, թե արդյոք իր վարած գործունեության պատճառով թուրքական իշխանությունների կողմից չի հետապնդվում, պատասխանել է, որ ինքն արդեն ավելի քան 20 տարի Մեծ Բրիտանիայում է ապրում, այնտեղի քաղաքացի է, սակայն վերջին երկու տարվա ընթացքում Թուրքիայի իշխանությունները սկսել են խիստ կեցվածք դրսեւորել իր նման գործունեություն ծավալող գործիչների նկատմամբ եւ ինքն զգուշավոր է գտնվում ու չի այցելում Թուրքիա:
Անդրադառնալով Արցախում ապրիլյան քառօրյա պատերազմին՝ իրավապաշտպանն ասել է. «Այս 4 օրը ցույց տվեց, որ ցեղասպանությունը թուրք ժողովրդի գենետիկ հատկանիշն է, որ կարողանում են մարդու գլուխը կտրել, ականջ կտրել, խոշտանգել մարմինները, հստակ կարող եմ ասել, որ սա թուրքական ձեռագիրն է: Դատապարտում եմ ենք նման գործելաոճը:
Ես այսօր եկել եմ Հայաստան, որպեսզի լինեմ հայ ժողովրդի կողքին եւ պահանջեմ Արցախի հարցում հայ ժողովրդի եւ արցախի կողքը կանգնելու: Մենք պահանջում ենք Արցախի հանրապետության ճանաչում»: