Անհրաժեշտ է ստեղծված իրավիճակը քննարկել Լեռնային Ղարաբաղի իշխանությունների հետ։ Այս մասին ապրիլի 25-ին խորհրդարանում ասել է «Ժառանգություն» խմբակցության պատգամավոր Զարուհի Փոստանջյանը։
Նրա խոսքով՝ անհրաժեշտ է հավաքվել եւ մանրամասն քննարկել այն բացթողումներ, որոնք թույլ է տվել հայկական կողմը ապրիլյան ռազմական գործողությունների ընթացքում։ Այդ քննարկումները պետք է հնարավորինս արագ կազմակերպել, քանի որ ռազմական գործողությունների վերսկսման հավանականություն կա եւ միգուցե ավելի ուժեղ։
ԱԺ փոխխոսնակ Էդուարդ Շարմազանովը հակադարձել է՝ իրավիճակին օպերատիվորեն արձագանքել են թե՛» ՀՀ, թե՛ ԼՂՀ իշխանությունները: «Ձեր ելույթը լսեր մի մարդ, որը վերջին 25 օրում թերթ չի կարդացել, ոչ էլ Հայաստանի ու Արցախի մասին տեղեկացել է, էդ մարդուն կթվա, որ Արցախի նկատմամբ արվել է ագրեսիա, Ազգային ժողովն էլ պարապ-սարապ նստած է եղել, նոր ուզում է ինֆորմացիա ստանալ: Այդպես չէ, խնդիրն արդյունավետության մեջ է: Եթե իմ անձնական տեսակետն եք ուզում, ես նպատակահարմար չեմ գտնում, որ Արցախի Հանրապետության վարչապետը, Ազգային ժողովի նախագահը գա, կանգնի ստեղ, եւ հաշվետվություն տա: Ուզում եք, գնացեք Արցախ եւ այնտեղ էլ լսեք, ինչն էլ արել եք»,-ասել է Շարմազանովը:
