Համաշխարհային հանրությունն այժմ անվտանգության նոր ճարտարապետության կարիք չունի, անհրաժեշտ է, որ գործեն առկա մեխանիզմները, համարում է ԵԱՀԿ-ի գլխավոր քարտուղար Լամբերտո Զանյերը: Նրա խոսքով, աշխարհում իրավիճակի հետեւողական զարգացումը պահանջում է համատեղ աշխատանքի կազմակերպման ավելի արդյունավետ միջոցների փնտրտուք:
«ԵԱՀԿ-ն ամուր համագործակցություն է հաստատել Միացյալ Ազգերի Կազմակերպության եւ տարածաշրջանային գործընկեր-կազմակերպությունների հետ: Մեզ պետք չէ անվտանգության նոր ճարտարապետություն: Մեզ իրոք անհրաժեշտ է վերադառնալ հիմքերին եւ ավելի լավ օգտագործել այն գործիքները, որ ունենք», — հայտնել է գլխավոր քարտուղարը Friends of Europe (Եվրոպայի բարեկամներ) կազմակերպության ամենամյա հարթակում անվտանգության վերաբերյալ առցանց-բանավեճերի շրջանակում իր հրապարակման մեջ:
Նրա կարծիքով, տարածաշրջանային այնպիսի կազմակերպությունները, ինչպիսին, օրինակ, ԵԱՀԿ-ն է, կարող են «ապահովել վաղաժամ կանխումը եւ ներառական եւ բացառիկ մեթոդների ներդրումը տարածաշրջանային տարբեր հակամարտությունների կանխարգելման նպատակով, այդ թվում` ճգնաժամերից եւ հակամարտություններից տուժած անդամների մասնակցությամբ»:
ԵԱՀԿ-ի գլխավոր քարտուղարը ենթադրում է, որ նման կազմակերպությունները կարող են հանդես գալ որպես ՄԱԿ-ի ավանգարդ` անվտանգության հարցերով համաձայնության հաստատման գործում, ընդ որում ոչ միայն մինչեւ այս խնդիրների` գլոբալ մակարդակի փոխանցման պահը, այլեւ ստանձնելով առաջատար դեր` սեփական տարածքում անվտանգության խնդիրների լուծման գործում, հայտնում է «ՌԻԱ Նովոստին»: