Ադրբեջանի զինուժը Մարտակերտի ուղղությամբ ամբողջ գիշեր կրակել է, որի հետեւանքով քաղաքում տուժել են տներ եւ խանութներ: Այս մասին այսօր՝ ապրիլի 26-ին, NEWS.am-ի հետ զրույցում ասաց Լեռնային Ղարաբաղի Մարտակերտի շրջանի վարչակազմի ղեկավար Վլադիկ Խաչատրյանը:
Նրա խոսքով, արկակոծությունից խաղաղ բնակիչներ չեն տուժել, այս պահին Մարտակերտում իրավիճակը հանգիստ է:
«Ամբողջ գիշեր Մարտակերտի ուղղությամբ կրակել է, որի հետեւանքով ավերածությունները եղել հիմնականում քաղաքի կենտրոնում՝ ավերվել են տներ, խանութներ»,- ասաց նա՝ հավելելով, որ քաղաքի բնակչությունը խուճապի չի մատնվել, նրանք պատսպարվել են ապաստարաններում:
Հիշեցնենք, որ ԼՂՀ ՊԲ-ի փոխանցմամբ, ապրիլի 25-ին եւ լույս 26-ի գիշերը հակառակորդը ՄՄ-21 (Գրադ) կայանքից արկակոծման է ենթարկել Մարտակերտ բնակավայրը (14 արկ): Հրետանային կրակ է վարվել նաեւ Մատաղիսի ուղղությամբ (8 արկ):
