ԱՄՆ նախագահի՝ Դեմոկրատական կուսակցության թեկնածու Հիլարի Քլինթոնն ու հանրապետական Դոնալթ Թրամփը վստահ հաղթանակներ են տարել նախնական ընտրություններում։
«Չորրորդ սուպերերեքշաբթիի» գլխավոր հաղթողը Թրամփն է։ Նա հաղթել է բոլոր 5 նահանգներում, որտեղ ընտրություններ են կայացել։
Փենսիլվանիայի նահանգում միլիարդատերը հավաքել է ձայների 57 տոկոսը։ Նրա հիմնական հակառակորդ Թեդ Քրուզը հավաքել է 21.4 տոկոս, իսկ Ջոն Քեյսիկը՝ 19.3 տոկոս։ Մերիլենդում Թրամփը հավաքել է 55 տոկոս, Քեյսիկը՝ 22.4 տոկոս, իսկ սենատոր Քրուզը՝ 18.9 տոկոս։ Քոնեքթիքութ, Դելավեր, Ռոդ Այլենդ նահանգներում Թրամփը 58-64 տոկոս ձայն է հավաքել։
Հանրապետական կուսակցության կողմից առաջադրվելու համար Թրամփին անհրաժեշտ է հավաքել 1237 պատվիրակների ձայները։
Ի տարբերություն մրցակցի՝ Հիլարի Քլինթոնը «չորով» չի հաղթել իր հակառակորդ Բերնի Սանդերսին։ Վերջինս հաղթել է Ռոդ Այլենդում՝ 55 տոկոս ձայնով։ Ամենահամառ պայքարը Քոնեքթիքութի նահանգում է եղել։ Այս պահին Քլինթոնը հավաքել է 51 տոկոս, իսկ Սանդերսը՝ 47։ Մյուս նահանգներում՝ Փենսիլվանիայում, Մերիլենդում եւ Դելավերում, Քլինթոնն ակնհայտ առավելություն է ունեցել՝ հավաքելով 56-69 տոկոս։ Սանդերսի լավագույն ցուցանիշը 43 տոկոսն է, որը նա հավաքել է Փենսիլվանիայում։
Դեմոկրատական կուսակցության կողմից առաջադրվելու համար Քլինթոնին անհրաժեշտ է հավաքել 2383 պատվիրակների ձայները։