Լեռնային Ղարաբաղում քառօրյա մարտական գործողությունների ժամանակ վիրավորված 125 զինծառայողներից 87-ն արդեն դուրս են գրվել եւ վերադարձել դիրքեր։ Այս մասին ապրիլի 27-ին լրագրողներին ասել է ՀՀ ՊՆ ռազմաբժշկական վարչության պետ Կամավոր Խաչատրյանը։

Նրա խոսքով՝ վիրավորները հոսպիտալում են եղել մինչեւ ապաքինվելը, ավելին՝ ապաքինվելուց հետո նրանց հետ աշխատել են հոգեբանները։ Հիմա նրանք բոլորը վերադարձել են ծառայության իրենց ստորաբաժանումներ։

Կամավոր Խաչատրյանը նշեց, որ մարտական գործողությունները սկսվելուց մինչեւ հիմա զինվորական հոսպիտալներում արվել է 148 վիրահատություն՝ թե՛ շատ բարդ, թե՛ հասարակ, այդ թվում՝ բեկորների հեռացում։ Անհրաժեշտության դեպքում նաեւ կրկնակի վիրահատություններ են իրականացվել։

Հիմա կլինիկաներում կա ծայրահեղ ծանր վիճակում գտնվող 3 զինծառայող։ Նրանցից երկուսը բուժում են ստանում «Էրեբունի» ԲԿ-ում, երրորդը՝ Կենտրոնական հոսպիտալում։ Նրանք բոլորը վիրավորվել են քառօրյա պատերազմի ընթացքում։ Խաչատրյանի խոսքով՝ բժիշկներն անում են հնարավոր ամեն բան նրանց կյանքը փրկելու համար։

Եվս մեկ զինծառայող ծայրահեղ ծանր վիճակում հոսպիտալացվել էր արդեն մարտական գործողությունները դադարեցնելու մասին պայմանավորվածությունից հետո։ Ապրիլի 13-ին նա գլխի շրջանում լուրջ վիրավորում էր ստացել։ Ադրբեջանի կողմից պայմանավորվածության խախտման հետեւանքով հայկական կողմն ունի 34 վիրավոր։ Նրանց բոլորին անհրաժեշտ օգնություն են ցուցաբերել, մեծ մասը վիրահատվել է։