Երեւան-Մեղրի ավտոճանապարհին մարտի 9-ին ուշ երեկոյան վթարի ենթարկված պայմանագրային զինծառայող Արկադի Հարությունյանը դուրս է գրվել ՀՀ ՊՆ Կենտրոնական կլինիկական զինվորական հոսպիտալից, սակայն շարունակում է մնալ բժիշկների հսկողության տակ: Այս մասին NEWS.am-ի հետ զրույցում ասաց Ռոման եւ Արկադի Հարությունյանների հարազատներից տիկին Զոյան` նշելով, որ նույն ավտովթարից տուժած Ռոմանը դեռ հոսպիտալում է եւ շարունակում է բուժումը: Ռոման Հարությունյանին ծնողները դեռ չեն տեղեկացրել նույն ավտովթարից մահացած եղբոր՝ Ռուսլանի մահվան մասին.
«Նա դեռ այնքան էլ լավ վիճակում չէ, դրա համար էլ դեռ չեն ասում եղբոր մասին: իսկ Արկադին արդեն երկու շաբաթ է տանն է, հիմնականում անկողնում է լինում, դեռ չի կարողանում երկար քայլել եւ նստել»,-ասաց տիկին Զոյան:
Նշենք, որ Երեւան-Մեղրի ավտոճանապարհին մարտի 9-ին ուշ երեկոյան վթարի ենթարկված պայմանագրային երեք զինծառայողներ` Արկադի, Ռուսլան եւ Ռոման Հարությունյանները եղբայրներ են, Արկադին եւ Ռոմանը տարբեր մարմնական վնասվածքներով տեղափոխվել են ՀՀ ՊՆ Կենտրոնական կլինիկական զինվորական հոսպիտալ, իսկ նրանց երրորդ եղբայրը` Ռուսլանը մահացել է:
Ավելի վաղ հայտնել էինք, որ 2016թ. մարտի 9-ին 23:00-ի սահմաններում, դեռեւս չբացահայտված հանգամանքներում, Երեւան-Մեղրի 80-րդ կմ-ում «Օպել» մակնիշի (վարորդ՝ 30-ամյա Կ. Կ.) ավտոմեքենան դուրս է եկել երթեւեկելի մասից եւ մոտ 250 մետր գլորվել է ձորը, ինչի հետեւանքով Կ. Կ.-ը եւ ուղեւոր, 35-ամյա Վ. Ղ.-ը տեղում զոհվել են:
Դեպքի առթիվ հարուցվել է քրեական գործ: Կատարվում է քննություն: