Հյուսիսային Կորեայի հերթական հրթիռի արձակումն անհաջողությամբ է ավարտվել, հայտնում է հարավկորեական «Յոնհապ» գործակալությունը:
Հյուսիսկորեացի զինվորականները, Սեուլում աղբյուրի տվյալներով, միջին հեռահարության «Մուսուդան» տեսակի բալիստիկական հրթիռի փորձարկում են իրականացրել: Հարավկորեացի զինվորականների գնահատականների համաձայն, հրթիռն ընկել է ԿԺԴՀ-ի արեւելյան առափնյա հատվածից իրականացված մեկնարկից մի քանի վայրկյան անց:
«Մեծ հավանականությամբ կարող եմ պնդել, որ արձակումը ձախողվել է: Հարավային Կորեայի եւ ԱՄՆ-ի ռազմական փորձագետները միջադեպի մանրամասն գնահատում են կատարում», — հայտնել է գործակալության աղբյուրը, հայտնում է Lenta-ն:
Հյուսիսկորեական հրթիռի նախորդ արձակումը տեղի էր ունեցել ապրիլի 15-ին եւ դարձյալ անհաջողությամբ էր պսակվել: Հետագայում` ապրիլի 24-ին ԿԺԴՀ-ն սուզանավից բալիստիկական հրթիռի արձակում էր իրականացրել: