ՀՀ վարչապետ Հովիկ Աբրահամյանն այսօր՝ ապրիլի 28-ին, կառավարության նիստի սկզբում աշխատանքի և սոցիալական հարցերի նախարար Արտեմ Ասատրյանին հանձնարարեց ներկայացնել ապրիլի 1-ից առաջնագծում զոհված զինծառայողների ընտանիքներին օգնություն ցուցաբերելու նպատակով արված ուսումնասիրությունների արդյունքները:
Ի պատասխան Արտեմ Ասատրյանը նշել է, որ ընտանիքների մի մասն ունեն վարկային պարտավորություններ, կոմունալ վճարներ, ուսանողներ եւ կան այնպիսի մարդիկ, որոնք աշխատանք չունեն և ցանկություն են հայտնել աշխատելու:
Նրա հավաստմամբ՝ զոհված զինծառայողների ընտանիքների բոլոր կարիքները գնահատված են եւ բոլոր ուղղություններով աշխատանքներ են տարվելու: Ա. Ասատրյանը նաև տեղեկացրեց, որ օրենսդրությամբ սահմանված է նաև 2 մլն դրամ ապահովագրական վճար՝ մարտական գործողություների ընթացքում զոհվելու դեպքում, ինչպես նաև 1 մլն 400 հազար դրամ հուղարկավորության կազմակերպման և 700 հազար դրամ՝ գերեզմանների բարեկարգման համար:
Վարչապետն էլ հայտնել է, որ ուսումնասիրության արդյունքում պատրաստել է հանձնարարականներ, որոնք կուղարկվեն բոլոր նախարարություններին:
