Մենք կանգնած ենք լայնածավալ պատերազմի առջեւ՝ չունենալով կոնսենսուս քաղաքական հարցերում: Այս մասին այսօր՝ ապրիլի 28-ին, ԱԺ-ում ԱԺ-ում Ընտրական օրենսգրքի նախագծի քննարկումների ժամանակ իր ելույթում ասաց պատգամավոր Զարուհի Փոստանջյանը:
«Քաղաքական լրջագույն հարցերից մեկն այսօր ոչ միայն Ընտրական օրենսգիրքն է, այլեւ ստեղծել ժողովրդի կողմից ընտրված եւ վստահելի ժամանակավոր կառավարություն, որը պետք է ձեւավորի օրինական իշխանություն: Մենք մի քանի օր առաջ ականատես եղանք, որ 3 գեներալներ հրաժարական են տվել, որոնց հիմքերը մեզ չներկայացրին, մինչդեռ ես կարծում եմ՝ ոչ թե այդ անձինք պետք է հրաժարական տային, այլ Սերժ Սարգսյանը, որի պատճառով մենք այսօր չենք կարողացել պաշտպանել մեր սահմանները, մեր երիտասարդների կյանքի շնորհիվ ենք կարողացել զսպել Ադրբեջանի ագրեսիան»,- ասաց նա:
Զարուհի Փոստանջյանի խոսքով՝ մեզ սպասվում է լայնածավալ պատերազմ եւ նման պայմաններում, եթե չունենք օրինական իշխանություն, ապա չենք կարող «բանեցնել ոչ քաղաքականություն, ոչ դիվանագիտություն, ոչ էլ ռազմական գործողություններ»:
Զարուհի Փոստանջյանը հիշեցրեց՝ ինքը միակ պատգամավորն էր, որը դեմ է քվեարկել ռուսական այն վարկին, որով 200 մլն դոլարի սպառազինություն պետք է ձեռք բերվեր:
«Այսօր ապացուցվում է, որ ոչ վարկն է տրամադրված, ոչ սպառազինությունը, որի կարիքն ունի Հայաստանի Հանրապետությունը: Այս պահին մենք պետք է ճանաչեինք Արցախի անկախութունը»,- ասաց նա:
Փոստանջյանի խոսքով՝ ընտարական օրենսգրքի տրամաբանությունն այն է, որ 13 ընտրատարածքների միջոցով իշխող ուժը մնա իշխանության, որ մարդիկ հնարավորություն ունենան ապօրինի հափշտակած՝ հանրային միջոցները պահել իրենց մոտ եւ շարունակեն ապօրինությունները:
Նրա խոսքով՝ պետք են արտահերթ միջոցառումներ, որ կայացվեն որոշումներ, որ բխեն ժողովրդի շահերից:
«Մենք ականատես եղանք, թե ինչպես էր Սերժ Սարգսյանը գնացել Ստեփանակերտ, որտեղ դուռը շպրտել էին իր վրա, ասել, որ որեւէ զիջում, որւեէ հողակտոր չենք պատրաստվում հանձնել որեւէ մեկին»,- ասաց նա:
