Նյու Յորքի ոստիկանությունն աննախադեպ ծավալով գործողություն է իրականացրել, որի ընթացքում Big Money Bosses եւ 2Fly YGz մրցակցող խմբավորումների անդամների է ձերբակալել:
Ըստ The New York Post-ի, գործողության ընթացքում, որին շուրջ հազար իրավապահ է մասնակցել, 120 մարդ է ձերբակալվել: Նյու Յորքի Հարավային շրջանի դատախազ Փրիթ Բհարարայի խոսքով, հանցավոր խմբավորումների անդամները տարիներ շարունակ «քաոս են սերմանել» Բրոնքսի փողոցներում: Քրեական պատերազմին մասնակցել է նաեւ Բոստոնի Slut Gang խմբավորումը:
Բանդաների բախումների ժամանակ, ընդհանուր առմամբ, 39 մարդ է զոհվել, այդ թվում՝ 92-ամյա Սեդի Միթչելը:
Ըստ NEWSru.com-ի, 2Fly-ը եւ Big Money Bosses-ը զբաղվել են թմրանյութերի եւ ուժեղ հոգեմետ միջոցների վաճառքով: Նրանք նաեւ զենք են պահել մանկական խաղահրապարակներում կամ մեքենաներում ու թմրանյութերի վաճառքով զբաղվելու վայրերին հարակից լքված տներում:
2Fly YGz-ի ղեկավար Ահարոն Ռոդրիգեսը՝ Գանզ մականունով, ձերբակալված է՝ 50 հազար դոլարի չափով գրավի դիմաց ազատ արձակվելու իրավունքով:
