ՄԱԿ-ի Անվտանգության խորհրդի անդամները նիստի ժամանակ կոնսենսուսի չեն եկել Ռուսաստանի կողմից առաջարկված հայտարարության նախագծի շուրջ, որը վերաբերում է մինսկյան պայմանավորվածությունների կատարմանը եւ 2014-ի մայիսի 2-ին Օդեսայում տեղի ունեցած իրադարձություններին:
ՄԱԿ-ում Ռուսաստանի մշտական ներկայացուցիչ Վիտալի Չուրկինը փաստաթուղթը չընդունելու հարցում հիմնական պատասխանատու է համարել ԱՄՆ-ին եւ Մեծ Բրիտանիային:
Չուրկինի խոսքով, վերջին 24 ժամում առաջարկի վերաբերյալ արձագանք է եղել միայն Ուկրաինայի պատվիրակության կողմից, որը այն անընդունելի է համարել, հաղորդում է «ՌԻԱ նովոստին»:
ՄԱԿ-ում ԱՄՆ մշտական ներկայացուցչի տեղակալ Միշել Սիսոնը հայտարարել է, որ իր երկիրը պատրաստ է աշխատել հայտարարության վրա, եթե այն արտահայտի Ուկրաինայի ընդհանուր իրավիճակը, որը վատթարացել է Ռուսաստանի գործողությունների հետեւանքով:
Մեծ Բրիտանիայի ներկայացուցիչն էլ նշել է, որ հայտարարությունում նշված չէ Ռուսաստանում դատապարտված ուկրաինացի Նադեժդա Սավչենկոյի վիճակը, ինչպես նաեւ իրավիճակը Ղրիմում:
Չուրկինը լրագրողներին ասել է, որ ամերիկացիներն ու անգլիացիները բավական անամոթաբար թույլ չտվեցին ընդունել այդ հայտարարությունը:
