ԱՄՆ ներկայացուցիչների պալատի զինված ուժերի հանձնաժողովի ավագ անդամ, Կոնգրեսական Լորետա Սանչեսը կոչ է արել հետաքննել զեկուցումներն այն մասին, որ Ադրբեջանի զինուժը, որն ամեն տարի ԱՄՆ-ից միլիոնավոր դոլարների տեսքով ռազմական օգնություն է ստանում, կոպտորեն խախտել է մարդու իրավունքները ապրիլի 2-ին Լեռնային Ղարաբաղի դեմ ագրեսիվ գործողությունների ժամանակ։ Այս մասին հայտնում են ԱՄՆ հայ դատի հանձնախմբից։
Հինգշաբթի Զինված ուժերի հարցի շուրջ իր ելույթում կոնգրեսականը նշել է, որ ուսումնասիրել է հավաստի պնդումներն այն մասին, որ Ադրբեջանի ԶՈւ-ն կոպտորեն խախտել է մարդու իրավունքները։ «Ես կարծում եմ, որ այդ խախտումներից ելնելով՝ մենք պետք է մեր ՊՆ քարտուղարին ուղարկենք մեր Պետքարտուղարի հետ աշխատելու համար, որպեսզի համատեղ հետաքննեն մարդու իրավունքների ոտնահարումների դեպքերը։ Ես կարծում եմ, որ ԱՄՆ-ը պետք է հետաքննություն վարի Ադրբեջանի բանակի կողմից Լիհիի օրենքի խախտումների կապակցությամբ։ ԱՄՆ-ը չի կարող աջակցություն ցուցաբերել զինված ուժերին, որոնք խախտում են մարդու իրավունքները»,- ասել է նա։
Սանչեսն իր ելույթում քննադատել է Ադրբեջանում մարդու իրավունքների ոտնահարումները եւ ուշադրություն հրավիրել այն հանգամանքի վրա, որ նախագահ Ալիեւը ներում է շնորհել եւ փառքի արժանացրել մարդասպան Ռամիլ Սաֆարովին։
