Իշխանությունները պետք է անպայման միջամտեն, որ մեծահարուստներն օգնեն, ներդրումներ անեն բանակի սպառազինության համար: NEWS.am-ի թղթակցի հետ զրույցում նման կարծիք հայտնեց ԱԺ ԲՀԿ խմբակցության պատգամավոր, ազատամարտիկ Ռուստամ Գասպարյանը` անդրադառնալով հասարակության այն պահանջին, որ օլիգարխներին պետք է կուլակաթափ անել եւ գումարներն ուղղել բանակին:
«Չգիտեմ` հասարակությունն ինչ է պահանջում, բայց ինչքան սպառազինությունը կրկնապատկենք, եռապատկենք, այնքան լավ: Մեծահարուստներն էլ պիտի օգնեն, ներդրումներ անեն: Ես երկու ձեռքով կողմ եմ դրան, պիտի անեն: Կանեն, թե չեն անի, չեմ կարող ասել: Իշխանությունները պետք է անպայման միջամտեն»,- ասաց Ռուստամ Գասպարյանը:
Այնուամենայնիվ, ազատամարտիկը, որն օրերին Արցախում էր, վստահեցրեց, որ մենք սպառազինության պակաս չունենք: Թեեւ ինքը Սերժ Սարգսյանի հայտնի բեռլինյան հայտարարությունը չի լսել, թե մենք կռվում ենք 80-ականներին զենքով, պնդեց, որ մենք ունենք հրթիռներ, որոնք անգամ ադրբեջանական կողմը չունի:
«Ադրբեջանական կողմն ընդամենը 2-3 հարյուր մետր է առաջ եկել, եթե մեր բանակը, սպառազինությունը տեղում չլինեին, ի՞նչ եք կարծում` այդքան կլիներ: Մեր բանակը տեղում կանխեց հակառակորդի առաջխաղացումը»,- հավելեց Ռուստամ Գասպարյանը:
