Հայաստանի իշխանությունները հենց պատերազմի առաջին օրը պետք է դիմեին ՄԱԿ-ի Անվտանգության խորհուրդ եւ պահանջեին ՄԱԿ-ի ԱԽ նիստ հրավիրել՝ կապված պատերազմական գործողությունների հետ: Այս մասին, այսօր՝ ապրիլի 29-ին, լրագրողների հետ հանդիպման ժամանակ նշել է Գլոբալիզացիայի եւ տարածաշրջնային համագործակցության վերլուծական կենտրոնի ղեկավար Ստեփան Գրիգորյանը՝ հավելելով, որ ինքն այդ մասին ասել է դեռ ապրիլի 2-ին:
«Ադրբեջանը սկսեց պատերազմական գործողություն եւ ակնհայտ է, որ մի քանի օր հետո կարվեր այնպես, որ պարզ չդառնա, թե ով է սկսել պատերազմը: Պետք էր առաջինը դիմել, որովհետեւ այդ դեպքում հակառակ կողմը պետք է արդարանա: Հայկական կողմը դա չարեց, փոխարենը դա արեցին ադրբեջանցիները: Նրանք դիմեցին ՄԱԿ-ի Անվտանգության խորհուրդ եւ ասաց, որ Հայաստանը հարձակվում է եւ դրա համար ուզում են դուրս գալ զինադադարի արձանագրություններից»,-ասաց նա:
Քաղաքագետի խոսքով, սա վկայում է այն մասին, որ մեր դիվանագիտությունը նախաձեռնողական չէ, նստած սպասում են ինչ է կատարվում, հետո լավ նամակներ են գրում: «Ի դեմ, հայկական կողմի պաշտոնական պատասխանը փայլուն էր, բայց ո՞ւմ է պետք այդ պատասխանը: Հիմա այնտեղ քննարկում են մի հարց՝ Հայաստանը հարձակվում է, Ադրբեջանը դիմեց, ինչ անենք: Հիմա պետք է հսկայական ջանքեր գործադրես, որ ապացուցես, որ դու չէիր հարձակվողը»,-ընդգծեց Ստեփան Գրիգորյանը:
Նրա խոսքով, Հայաստանի դիվանագիտության վատ աշխատանքի պատճառով է, որ շատ երկրներ՝ Ուկրաինա, Բելառուս, Ղազախստան, նաեւ Իսլամական կոնֆերանսի կազմակերպությունը հանդես եկան Ադրբեջանի կողմից: «Բոլորովին բնական չէ, որ Իսլամական կոնֆերանսի համագործակցության երկրները ադրբեջանամետ հայտարարություն ընդունեցին: Այդ կազմակերպության մեջ մեծ թիվ են կազմում արաբական երկրները, իսկ արաբական շատ երկրների հետ Հայաստանը ջերմ հարաբերություններ ունի, այնտեղ հայկական համայնքներ ունի: Սա նշանակում է, որ աշխատանքի տեղ կար, բայց թերացել են»,-ասաց քաղաքագետը:
