Թուրքիան շարունակում է իր ճիրաններում ճնշել խոսքի ազատությունը: Այս անգամ Անկարայի թիրախն է դարձել պատմության մոռացված ու երկար ժամանակ լռության մատնված էջը՝ասորիների ցեղասպանությունը, որը եղել է պատմականորեն բազմամշակույթ տարածքը թուրքականացնելու փորձի մի մասը: Այս մասին գրում է իտալացի լրագրող Սիմոնե Ձոպելարոն այն հոդվածում, որը հրապարակվել է իտալական Il Giornale պարբերականի Gli Occhi della Guerra «Պատերազմի աչքերը» բաժնում: Հոդվածում մասնավորապես ասվում է .
«Ասորիների ցեղասպանությունը ճանաչվել է մի շարք երկրների՝ Ավստրիայի, Նիդեռլանդների, Հայաստանի, Շվեդիայի խորհրդարանների կողմից:
Եվ հենց Շվեդիայում է եղել թուրքական դիվանագիտության կողմից գրաքննության վերջին փորձը: Ապրիլի 24-ին, երբ ասորիները հիշում են 1915-ի ցեղասպանության զոհերին, TV4 հեռուստաալիքը նամակ է ստացել Թուրքիայի դեսպանատնից՝ «ֆիլմը հեռարձակելու որոշումը վերանայելու» խնդրանքով:
Շվեդական հեռուստաալիքը սակայն թույլ չի տվել իր վրա ճնշում գործադրել: Խմբագիր Վիվեկա Հանսոնը հայտնել է «Մենք երբեք չենք ընդունի նման խնդրանք: Մենք կդիմակայենք խոսքի ազատությանը սպառանցող ցանկացած փորձի»:
Դրանից հետո մենք զրուցել ենք Աֆրամ Յակուբի՝ Շվեդիայի Ասորիների ֆեդերացիայի նախագահի հետ, որն էլ հենց ստեղծել է վերոնշյալ փաստագրական ֆիլմը: «Դեսպանատունը վարում է ժխտողականության պաշտոնական քաղաքականությունը ու կատարում Անկարայի ցուցումները՝ փորձելով արգելափակել այն միջոցառումները, որոնք պատմում են մեր ժողովրդի ցեղասպանության մասին:
Սա առաջին դեպքը չէ: Բառացիորեն վերջերս մի թուրքական կազմակերպություն խնդրել էր փակել այն ցուցահանդեսը, որը պատմում է ցեղասպանության տարիներին ասորի կանանց ճակատագրի մասին: Իմ անձնական կարծիքով Թուրքիայի ներկա քաղաքականությունը թուրք ժողովրդի շահերից չի բխում: Պատմությանը առերեսվելը շատ կարեւոր է, եթե երկիրը ուզում է զարգանալ ու կառուցել իսկական ժողովրդավարություն»,- հայտնել է նա: