Թուրքիայի քրդաբնակ Դիարբեքիրի Սուրի շրջանում գտնվող հայկական Սուրբ Կիրակոս եկեղեցու հիմնադրամը եկեղեցու պետականացումը չեղյալ հայտարարելու համար դիմել է դատարան։
Ինչպես տեղեկացնում է Ստամբուլի հայկական «Ակոս»-ը, Դիարբեքիրի Սուրբ Կիրակոս եկեղեցու հիմնադրամի փաստաբաններից Ալի Էլբեյօղլուն նշել է, որ եկեղեցու պետականացումը չեղյակ հայտարարելու համար դատական հայց է ներկայացվել վարչապետի աշխատակազմի եւ Քաղաքաշինության նախարարությունների դեմ։
Փաստաբանը շեշտել է, որ եկեղեցու պետականացումը հակասում է մշակույթային ժառանգության պահպանության օրենքին, միջազգային համաձայնագրերին, այդ թվում Լոզանի համաձայնագրին։
Նշենք, որ Թուրքիայի նախարարների խորհրդի որոշումով Դիարբեքիրի Սուրի շրջանում գտնվող բոլոր կառույցները, այդ թվում Դիարբեքիրի Սուրբ Կիրակոսը, պետականացվել են։
Մերձավոր Արեւելքի ամենամեծ եկեղեցիներից մեկի՝ Սուրբ Կիրակոսի վերաբացումն ու օծումը տեղի է ունեցել 2011- հոկտեմբերի 22-ին, իսկ առաջին պատարագը մեկ օր անց՝ հոկտեմբերի 23-ին:
Սուրբ Կիրակոսի վերանորոգումը իրականացվել է դիարբեքիրցի հայերի եւ Դիարբեքիրի քաղաքապետարանի աջակցությամբ:
Սուրբ Կիրակոսը վերաբացվել է որպես գործող եկեղեցի: