Հայաստանը կարեւորում է ԵՄ հետ փոխշահավետ համագործակցության ամրապնդումը: Այս մասին, այսօր՝ մայիսի 2-ին, Ֆինլանդիայի փոխվարչապետ, արտգործնախարար Թիմո Սոինիի հետ հանդիպման ժամանակ նշել է Հայաստանի ԱԳ նախարար Էդվարդ Նալբանդյանը:

ԱԳՆ-ից NEWS.am-ին հայտնում են, որ զրուցակիցները պայմանավորվել են ակտիվացնել բարձր մակարդակով փոխայցելությունները, երկու արտաքին քաղաքական գերատեսչությունների միջեւ խորհրդատվությունները, սերտացնել միջազգային կազմակերպությունների շրջանակներում փոխգործակցությունը:

Նախարարները հանգամանալից զրուցել են երկկողմ օրակարգի հարցերի լայն շրջանակի շուրջ։ Երկուստեք կարեւորվել է խորհրդարանների միջեւ շփումների խթանումը։ Հայաստանի եւ Ֆինլանդիայի արտաքին քաղաքական գերատեսչությունների ղեկավարները մտքեր են փոխանակել տնտեսական, մշակութային, կրթական եւ այլ ոլորտներում համագործակցության զարգացմանն առնչվող հարցերի շուրջ: Հայաստանի եւ Ֆինլանդիայի արտգործնախարարները ընդգծեցին իրավապայմանագրային դաշտի ընդլայնման անհրաժեշտությունը:

Անդրադարձ է կատարվել ԵՄ հետ Հայաստանի հարաբերություններին, ՀՀ-ԵՄ նոր իրավական հիմքի շուրջ բանակցություններին: Էդվարդ Նալբանդյանը նշել է, որ Հայաստանը կարեւորում է ԵՄ հետ փոխշահավետ համագործակցության ամրապնդումը:

Հայաստանի եւ Ֆինլանդիայի արտգործնախարարները քննարկել են տարածաշրջանային եւ միջազգային հրատապ հարցեր` Իրանի միջուկային ծրագրի շուրջ պայմանավորվածությունների իրագործումը, իրավիճակը Մերձավոր Արեւելքում, միգրացիոն ճգնաժամը, ահաբեկչության դեմ պայքարը:

Էդվարդ Նալբանդյանը Թիմո Սոինիին հրավիրել է այցելել Հայաստան:

 Հանդիպման ավարտին նախարարները հանդես եկան համատեղ մամլո ասուլիսով։