Առաջիկա տեղական ինքնակառավարման եւ ՀՀ ԱԺ ընտրություններին «Հայ Յեղափոխական Դաշնակցությունը» մասնակցելու է իր ներուժի ողջ կարողականությամբ: Նմանատիպ որոշում է ընդունվել ՀՅԴ Հայաստանի կազմակերպության 20-րդ Գերագույն ժողովը, որը մայիսի 1-ին հաստատել է կուսակցության առաջիկա երկու տարիների գործունեության ռազմավարական ուղենիշներն ու մարտավարությունը:
ՀՅԴ մամուլի ծառայության տարածած հաղորդագրության համաձայն, Ժողովն արձանագրել է կուսակցության վճռականությունը՝ ՀՀ նոր Սահմանադրության ընձեռած հնարավորությունների եւ մեխանիզմների շրջանակում նախանձախնդիր հետեւողականորեն դերակատար դառնալու երկրում սոցիալական արդարություն, արդար դատական համակարգ սահմանող, մարդու իրավունքներն ու ազատությունները երաշխավորող, արդյունավետ կառավարում, ազատ ընտրություններ ապահովող, աղքատությունը, գործազրկությունն ու արտագաղթը հաղթահարող համակարգ հաստատելու ուղղությամբ:
Գերագույն ժողովը քննել է նաեւ ԼՂՀ շուրջ ծավալվող վերջին իրադարձություններն ու ընթացող պատերազմը: Բարձր գնահատելով հայկական զինած ուժերի մարտունակությունը, հակառակորդի լայնածավալ հարձակումը անձնազոհաբար կասեցնելու կամքը՝ Գերագույն ժողովը վշտակցել է զոհված զինծառայողների հարազատներին: Ժողովը միաժամանակ խոր մտահոգություն է հայտնել այն բացթողումների, խնդիրների ու մարտահրավերների առնչությամբ, որոնք ի հայտ եկան քառօրյա պատերազմի ընթացքում:
ՀՅԴ-ականները վերահաստատել են Արցախի ազգաբնակչության ազատ կամաարտահայտությամբ դրսեւորված հիմքերով ԼՂՀ հիմնախնդիրը հանգուցալուծելու ՀՅԴ անզիջում վճռականությունը, շեշտել հակամարտությունը միջազգային իրավունքի նորմերով եւ սկզբունքներով կարգավորելու, ԼՂՀ-ն որպես բանակցային կողմ ներգրավելու, ինչպես նաեւ միջազգային կառույցներում Հայաստանի Հանրապետության եւ ԼՂՀ ամբողջական անվտանգության երաշխիքներն ամրագրելու անհրաժեշտությունը:
Ինչ վերաբերում է բանակցային գործընթացին, Գերագույն ժողովն առաջնահերթություն է գնահատել ՀՀ եւ ԼՂՀ պետականությանն ու ազգաբնակչության անվտանգությանն ուղղված ադրբեջանական շարունակական ագրեսիայի չեզոքացման գործողությունների ծրագիրը: