Այս գիշեր Ստեփանակերտի հոսպիտալում մահացած 20-ամյա Սարգիս Գասպարյանը վիրավորվելուց հետո զինակից ընկերներին խնդրել է ընտանիքին չասել այդ մասին, որպեսզի չանհանգստանան։ Դեպքը պատահել էր ապրիլի 29-ի լույս 30-ի գիշերը Թալիշի դիրքերում։ Սարգիսը փորձել էր փրկել ընկերոջ կյանքը, սակայն ինքն էլ էր վիրավորվել ոտքից եւ որովայնի աջ կողմից։ NEWS.am-ի հետ զրույցում դեպքից որոշ մանրամասներ է պատմել Սարգսի զինակիցներից մեկը։
«Սաղ գիշեր գլխներիս կրակ էին մաղում։ Գնդակների տարափի տակ Սարգիսը գնացել էր վիրավոր ընկերոջը փրկելու, բայց ինքն էլ էր վիրավորվել։ Սեւանցի մի տղա կար՝ Սասունը, ինքն օգնել էր Սարգսին, փրկել կրակի տակից եւ վիրավորվել»,- պատմում է զրուցակիցը։
Վիրավոր ընկերներին գտել էին դիրքերում եւ շտապ տեղափոխել Մարտակերտի հոսպիտալ։
Սարգսի մոտ որովայնի աջ շրջանի վիրավորում է ախտորոշվել՝ որովայնի օրգանների վնասումով։ Սասունը աջ ազդրի կույր գնդակային վիրավորում էր ստացել։
Մարտական ընկերները ցավով են հիշում պատահածը եւ դժվարությամբ են խոսում՝ ասես չուզենալով բառերով նորից վերապրել կորուստը. «Շատ էր մտածում ընտանիքի մասին, որ չանհանգստանան։ Ասել էր՝ մերոնց չասեք, կանհանգստանան։ Էլ ի՞նչ պատմեմ։ Խփեցին... տարան հիվանդանոց, վիրահատեցին... չապրեց»։
Նշենք, որ Սարգիսը վիրավորվել էր ապրիլի 29-ի երեկոյան ժամը 22.20-ի սահմաններում: Նա վիրավորում է ստացել ոտքից եւ որովայնի աջ կողմում՝ վնասվել են գրեթե բոլոր ներքին օրգանները: Սկզբում Սարգիսին վիրահատել են Մարտակերտում, ապա տեղափոխել Ստեփանակերտի հիվանդանոց:
Սարգիսը Շուշի քաղաքից էր, սովորում էր Ստեփանակերտի «Մեսրոպ Մաշտոց» համալսարանի երկրորդ կուրսում: