Այս փուլում դեռեւս վաղ է խոսել ադրբեջանական ագրեսիայի հետեւանքով վիրավորված զինծառայողներին արտերկիր բուժման ուղարկելու մասին: Այս մասին NEWS.am-ի թղթակցի հետ զրույցում ասաց ՀՀ առողջապահության նախարար Արմեն Մուրադյանը:
«Հաշվի առնելով, որ նման բուժման կարիքը կլինի հիմնականում վերականգնողական մասով, այս փուլում չունենք դեպքեր, որ Հայաստանի ռեսուրսը չի բավարարում եւ պետք է արտերկիր ուղարկել: Անհրաժեշտության դեպքում կկազմակերպենք հանձնաժողովներ, կանեն մասնագիտական վերլուծություններ եւ դրանց հիման վրա արդեն կընտրվի կլինիկան, իսկ համապատասխան ֆինանսավորումը կտրամադրի կառավարությունը»,- ասաց Արմեն Մուրադյանը:
Արմեն Մուրադյանը հիշեցրեց, որ ապրիլի 21-ին ընդունված որոշումը վերաբերում է այն դեպքերին, երբ Հայաստանը չի կարողանում ապահովել այդ բուժումը. «Կոնկրետ անձ դեռ չունենք, որը կարիք ունի: Կան զինծառայողներ, որոնք վերականգնողական բուժման կարիք կունենան, սակայն դեռ վաղ է այդ մասին խոսելը»:
Հիշեցնենք, որ Հայաստանի կառավարությունն ապրիլի 21-ի նիստի ժամանակ հաստատել է զինծառայողներին արտասահմանում բուժման ուղարկելու կարգը: Միջոցները հատկացվելու են այն զինծառայողներին, որոնք տուժել են առաջնագծում իրենց պարտականությունները կատարելիս:
Արտասահման ուղարկելը նախատեսված է այն դեպքերի համար, երբ համապատասխան բուժումը Հայաստանում անհնար է իրականացնել: Ծախսերը ներառելու են հետազոտությունն ու բուժումը, նաեւ ճանապարհածախսն ու բնակության ծախսերը:
