Գեղարքունիքի մարզում մայիսի մեկին երեկոյան տեղի ունեցած ողբերգական վթարի հետեւանքով տուժած 2-ամյա Հասմիկի վիճակը լավ է: Այս մասին NEWS.am-ը տեղեկանում է առողջապահության նախարարությունից:

Երեխան, որ գտնվում է Երեւանի «Սուրբ Աստվածամայր» բժշկական կենտրոնում, վերակենդանացման բաժանմունքից տեղափոխվել է հիվանդասենյակ:

2-ամյա աղջնակը, որի ծնողներն ու կրտսեր քույրը մահացել են ավտովթարի ժամանակ, ստացել է գլխուղեղի ցնցում եւ ազդրի կոտրվածք տեղաշարժով:  

Ավելի վաղ ԱԻՆ-ը հայտնել էր, որ մայիսի 1-ին ժամը 22.42-ի սահմաններում Վարդենիս-Կարճաղբյուր ավտոճանապարհին` Ծովակ գյուղի մոտակայքում տեղի է ունեցել ավտովթար:

Պարզվել է, որ Մ-11 ավտոճանապարհի Մարտունի-Վարդենիս հատվածի 27-րդ կմ-ին բախվել են «Mercedes C220» մակնիշի 15 LO 370 և «Kia Sonata» մակնիշի 198 LO 61 պետհամարանիշներով ավտոմեքենաները, ինչի հետևանքով 6 մարդ մահացել է, մեկ մանկահասակ երեխա էլ տեղափոխվել հիվանդանոց:

Դեպքի հանգամանքները պարզվում են: