Ֆինլանդիայի խորհրդարանի խոսնակ Մարիա Լոհելան, այսօր՝ մայիսի 3-ին, պաշտոնական այցով Հելսինկիում գտնվող ԱԳ նախարար Էդվարդ Նալբանդյանի հետ հանդիպման ժամանակ դատապարտել է ԼՂ հակամարտության գոտում ուժի կիրառումը:

ԱԳՆ-ից NEWS.am-ին հայտնում են, որ հանդիպմանը ներկա էին խորհրդարանի արտաքին հարաբերությունների հանձնաժողովի նախագահը, Ֆինլանդիա-Հայաստան խորհրդարանական բարեկամության խմբի ղեկավարը։

Հանդիպմանը զրուցակիցներն անդրադարձան Հայաստանի Ազգային ժողովի եւ Ֆինլանդիայի Էդուսկունտայի միջեւ շփումների խթանման հարցերին՝ կարեւորելով խորհրդարանական դիվանագիտությունը՝ որպես ժողովուրդների միջեւ բարեկամության ամրապնդման եւ խորացման կարեւոր ձեւաչափ։

Հանդիպման օրակարգում էին միջազգային կազմակերպությունների խորհրդարանական վեհաժողովներում Հայաստանի եւ Ֆինլանդիայի օրենսդիր մարմինների պատվիրակությունների փոխգործակցության սերտացմանն առնչվող հարցեր:

Զրուցակիցներն անդրադարձան ապակենտրոնացված, մշակութային եւ գիտակրթական ոլորտներում փոխգործակցությանը վերաբերող հարցերի:

Մտքեր փոխանակվեցին առեւտրատնտեսական համագործակցության խթանման ուղիների, Հայաստան-Եվրոպական միություն հարաբերությունների շուրջ։

Հայաստանի արտգործնախարարը Ֆինլանդիայի խորհրդարանի ղեկավարին ներկայացրեց Արցախի դեմ ապրիլի սկզբին Ադրբեջանի ագրեսիվ ռազմական գործողությունների սանձազերծումն ու դրա հետեւանքների հաղթահարմանն ուղղված՝ Հայաստանի եւ ԵԱՀԿ Մինսկի խմբի համանախագահների կողմից գործադրվող ջանքերը։

Ֆինլանդիայի խորհրդարանի ղեկավարը դատապարտեց ղարաբաղյան հակամարտության գոտում ուժի կիրառումը եւ մարդասիրական իրավունքի խախտումները՝ ընդգծելով, որ իր երկիրը միանշանակ աջակցում է հիմնախնդրի խաղաղ բանակցային կարգավորմանը։