Ֆրանսիայի Բուրգ լե Վալանս քաղաքի ղեկավար Մառլեն Մուրիերը Ադրբեջանին իր տեղն է ցույց տվել Լեռնային Ղարաբաղի Շուշի քաղաքի հետ բարեկաման կապերը խզելու առաջարկ ստանալուց հետո։ Այս մասին գրում է Die Welt-ը։
Հոդվածում հիշատակվում է, որ տարիներ շարունակ ֆրանսիական Բուրգ լե Վալանս քաղաքը բարեկամական կապերի մեջ է Շուշիի հետ, որն ամրապնդված է բարեկամության հռչակագրով։ Օրերս, սակայն, Բուրգ լե Վալանսի քաղաքապետ, Ֆրանսիայի նախկին նախագահ Նիկոլա Սարկոզիի Հանրապետական կուսակցության անդամ Մառլեն Մուրիերը Ադրբեջանի կողմից նախազգուշացում էր ստացել Շուշիի հետ բարեկամական կապերը խզելու պահանջով։ Ադրբեջանը պահանջել էր արգելել դեպի Շուշի պաշտոնական այցելությունները, քաղաքների միջեւ փորձի փոխանակումը։ «Ադրբեջանն ուզում էր արգելել երկու քաղաքների միջեւ բարեկամությունը։ Ինչպե՞ս կարող է արգելել։ Ֆրանսիան մարդու իրավունքների երկիր է։ Նմանատիպ սպառնալիքները չեն տպավորում ինձ»,- Ադրբեջանին իր պատասխանն է տվել քաղաքապետը։
Թերթը հիշեցնում է, որ եթե անգամ չլիներ Մուրիեի մերժումը, այս նախազգուշացումը որեւէ իրավական հիմք չունի։
«Դեռ 2 տարի առաջ, երբ քաղաքապետը մեկնել էր Շուշի եւ բարեկամության հռչակագիր ստորագրել իր հայ գործընկերների հետ, Ադրբեջանը նրան ընդգրկել էր «սեւ ցուցակում»։ Իսկ հիմա Ֆրանսիայում Ադրբեջանի դեսպանատունը դատական կատարածու է ուղարկել քաղաքապետի մոտ»,- գրում է թերթը։
«Կատարածուն ինքն էլ մի փոքր շփոթված էր դեսպանատան նման տարօրինակ եւ անհեթեթ ուղերձի պատճառով»,- ասել է Բուրգ լե Վալանսի քաղաքապետը։
