ՀՀ պաշտպանության նախարար Սեյրան Օհանյանն այսօր Ազգային ժողովում ճեպազրույցի ժամանակ ռազմական ղեկավարության թերացումների մասին հետաքրքրվող լրագրողների խորհուրդ է տվել փառաբանել բանակն ու հերոսներին։ «Եթե դուք իմանաք՝ ինչ է նշանակում պաշտպանություն։ Ինչ է նշանակում պաշտպանության խորքում համապատասխան մարտավակարան գործողություններ, հատկապես դասակ, վաշտ օղակներում համապատասխան գործողությունները, ապա չեք կարող ասել՝ պաշտոնանկություններ կան, թե չկան...
Պաշտոնանկությունները ԼՂՀ ՊԲ խնդիրն է, եւ երկրորդը, եթե բանակը հերոսություններ կատարելով իր առջեւ դրված խնդիրը կատարել է, ինչի մասին խոսք կարող է լինել, խորհուրդ կտայի փառաբանել այն հերոսներին, ովքեր իրենց կյանքի գնով հերոսացել են եւ բարձր պահել մեր ազգի արժանապատվությունը»։ Նա շեշտել է, որ կարծիքներով չեն առաջնորդվում։ Ռազմաքաղաքական ղեկավարությունն է որոշումներ ընդունում եւ պետական կարեւորության որոշումները քննարկում են կարեւոր ատյաններում։
«Բանակում ծառայած մարտական գործողությունների մասնակցած անձնավորությունները պետք է հստակ պատերացնեն եւ առաջին հերթին իրենք են գիտակցում՝ ինչ է նշանակում մարտ ու մարտական գործողությունների ժամանակ լայնածավալ հարձակողական խմբավորում հետ տալ, կրակի տակ լինել՝ հոգեբանական ճնշման, որոշակի վախի շրջանակներում, եւ այսօր ասեք՝ այսպես են գործել, կամ այնպես... Յուրաքանչյուրը իր կարծիքը թող թողնի իր համար»,-ասել է Օհանյանը։