Փաստորեն ապացուցվեց, որ Արցախի անկախության ճանաչման նախագծի դեմ իշխանության հակափաստարկներն հիմք չունեն եւ չեն համապատասխանում իրականությանը, քանի որ ժամ առ ժամ իրավիճակ է փոխվում։ Այս մասին այսօր՝ մայիսի 5-ին, NEWS–ի հետ զրույցում ասաց «Ժառանգություն» խմբակցության պատգամավոր Զարուհի Փոստանջյանն՝ անդրադառնալով այն փաստին, որ կառավարությունը հավանություն է տվել իր եւ Հրանտ Բագրատյանի հեղինակած՝ Արցախի անկախության ճանաչման մասին նախագծի վերաբերյալ կառավարության եզարկացությանը:
«Իրենք հասկանում են լրջությունը պահի եւ դա է հավանաբար պատճառը, որ փոխել են իրենց մոտեցումները»,-ասաց Զարուհի Փոստանջյանը։
Ինչ վերաբերում է Ադրբեջանի այն հայտարարություններին, որ Հայաստանի՝ Լեռնալին Ղարաբաղի անկախության ճանաչումից հետո լայնածալ պատերազմ կսկսվի, Փոստանջյանն ասաց. «Մենք այսօր գտնվում ենք պատերազմի մեջ, մեզ ուժգին լայնածավալ գործողություններ են սպասվում, հետեւաբար խոսել պատերազմի մասին, բացարձակ տեղին չէ, եւ կապ չունի մեր քաղաքական հայտի ու որոշման հետ։ Ադրբեջանն իր պաշտոնական հայտարարությունն արդեն հղել ՄԱԿ-ին, որով ասում է՝ դադարեցնում է զինադադարը եւ միակողմանի դուրս գալիս զինադադարի կնքման պարտականություններից: Բացի այդ, Արցախի ժողովրդի վրա հարձակումը առաջին անգամ չէ, շուրջ 25 տարի Ադրբեջանը հարձակվում է Արցախի վրա, կիրառում ագրեսիա, հիմա արդեն երկրորդ փուլն է լայնածավալ գործողությունների»։
