Մինսկի գործընթացի ավարտ կնշանակի Ադրբեջանի ագրեսիան, ոչ թե մեր իրավական քայլերը: Այս մասին, այսօր՝ մայիսի 5-ին, կառավարության նիստից հետո լրագրողների հետ զրույցում նշել է ԱԳ փոխնախարար Շավարշ Քոչարյանը:
Անդրադառնալով ԼՂՀ ճանաչման մասին ԱԺ «Ժառանգություն» խմբակցության պատգամավոր Զարուհի Փոստանջյանի և ԱԺ ՀԱԿ խմբակցության պատգամավոր Հրանտ Բագրատյանի ներկայացրած օրինագծին, Շավարշ Քոչարյանն ասաց. «Կառավարության եզրակացությունն այն է, որ ԼՂՀ անկախության ճանաչումը պայմանավորված է երկու հայկական պետությունների միջև բանակցությունների արդյունքով՝ հաշվի առնելով հետագա զարգացումները, այդ թվում արտաքին գործոնները: Ինչ վերաբերում է ԼՂՀ ճանաչման խնդրին, ապա մեր դիրքորոշումը շատ հստակ է, ու եթե Ադրբեջանը փորձի խուսափել զինադադարի հաստատման ռեժիմից և նոր ագրեսիա ծավալի, ապա ճանաչման հարցը միանշանակ կմտնի օրակարգ»:
Հարցին, թե արդյոք դա չի նշանակի Մինսկի գործընթացի ավարտ, ԱԳ փոխնախարարն արձագանքեց. «Մինսկի գործընթացի ավարտ կնշանակի Ադրբեջանի ագրեսիան, ոչ թե մեր իրավական քայլերը»:
Նշենք, որ ՀՀ կառավարությունն, այսօր՝ մայիսի 5-ին, իր նիստում հավանություն տվեց Ազգային ժողովի պատգամավորներ Զարուհի Փոստանջյանի եւ Հրանտ Բագրատյանի՝ օրենսդրական նախաձեռնության կարգով ներկայացրած «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ կառավարության եզրակացության նախագծին: Այն կքննարկվի խորհրդարանում:
