Մենք չենք տեսնում հակառակորդ կամ կողմ, որը պատրաստ է բանակցելու: Չի զգում այն առանցքը, որի շուրջ կարելի է բանակցել, մենք կողմնակից ենք բանակցությունների, պատրաստ ենք բանակցությունների սեղանի շուրջ նստելու, բայց հակառակորդի վարքագիծը չի հուշում, որ ինքը պատրաստ է բանակցելու: Այս մասին մի շարք լրատվամիջոցների հետ հարցազրույցում ասել է Արցախի վարչապետ Արա Հարությունյանը՝ նշելով, որ ցանկացած պահի, եթե ինչ-որ բանակցության թեմա լինի եւ համանախագահող երկրները, եւ Հայաստանի Հանրապետության նախագահը նշել է, որ Արցախը կմիանա այդ գործընթացին: «Կարեւոր փուլում Արցախը միանալու է, եթե Արցախը բանակցություններին չի մասնակցում, նշանակում է՝ որեւէ լուրջ գործընթաց, բանակցություն հնարավոր չէ: Դրա համար էլ ես նշում եմ, որ դրանք հանդիպումներ են, ոչ թե բանակցություններ: Մենք պատրաստ ենք բանակցային գործընթացների, այդ թվում նաեւ փոխզիջումների: Եթե մեզ հետ որեւէ քննարկում չեն ուզում, ես ինչպես կարող եմ ինչ-որ բան ասել, թե պատրա՞ստ ենք արդյոք տարածքային, քաղաքական փոխզիջումների: Դրա պատասխանը տալու է ժողովուրդը, ոչ թե ես, կամ այլ պաշտոնյա»,-ընդգծել է Հարությունյանը:
Խոսելով Արցախում տիրող այսօրվա իրավիճակի մասին՝ վարչապետը նշել է, որ ցանկացած պատերազմ իր հետեւանքներն է թողնում եւ ժամանակ է անհրաժեշտ ընդհանուր առմամբ իրավիճակը կարգավորելու առումով: «Սահմանում կա լարվածություն, եւ եթե գնահատելու լինենք, մի կողմից դեռ պրովոկացիաների ենք սպասում, մյուս կողմից՝ ուզում ենք մարտական գործողությունների հետքերը վերացնել եւ անցնել լիարժեք կյանքի: Այժմ ապրում ենք իրականում «ոչ պատերազմ, ոչ խաղաղություն» իրավիճակում: Սահմանում հակառակորդի կողմից կան կուտակումներ, մեծ քանակությամբ ռազմատեխնիկայի կուտակում կա եւ հակառակորդին չի կարելի վստահել»,-ասել է նա:
Հարությունյանն ընդգծել է, որ Արցախի տարածքն ամրագրված է Սահմանադրությամբ, ու այդ տարածքների որոշ մասը գտնվում է ադրբեջանցիների վերահսկողության տակ:
«Մենք բազմաթիվ անգամ նշել ենք, որ պատրաստ ենք բանակցությունների, հասկանում ենք նաեւ բանակցություններ նշանակում է վերջնական տարբերակով փոխիջումներ, բայց դա պայմանավորված է Արցախի անկախության ճանաչման կամ ինքնորոշման հարգման պարագայում»,-նշել է վարչապետը: