Լեհաստանի ներքին անվտանգության գործակալությունը հետապնդում է իրականացրել 52 լրագրողի նկատմամբ այն ժամանակ, երբ իշխանության էր եկել «Քաղաքացիական հարթակ» կուսակցությունը: Այդ մասին չորեքշաբթի «Օրենք եւ արդարություն» կուսակցության նոր կառավարությունում հայտնել է հատուկ ծառայությունների աշխատանքի համար պատասխանատու նախարար Մարիուշ Կամինսկին: Նա սեյմում հանդես է եկել հանրապետության 2007-ից մինչեւ 2015-ին գործած նախկին կառավարության գործունեության մասին զեկույցով, հայտնում է ՏԱՍՍ-ը:
«Հատուկ ծառայությունները հետեւել են 52 լրագրողի,-ասել է նա: Նրանք լսել են այդ մարդկանց հեռախոսները, հետեւել նրանց գտնվելու վայրին, վերլուծել են բոլորին, ում հետ նրանք շփվել են, այդ շփումների հաճախությունը, տվյալներ են հավաքել հասցեների եւ ընտանիքում իրավիճակի մասին»:
Բացի այդ, Կամինսկու խոսքով, հատուկ ծառայություններն անմիջական վերահսկողություն են իրականացրել լրագրողների նկատմամբ նրանց հանդիպումների ընթացքում, լուսանկարներ են արել, յոթ լրագրողի նկատմամբ օգտագործվել է այնպիսի տեխնոլոգիա, որը թույլ էր տալիս որոշել բոլոր հասցեները, որոնց նրանք զանգում էին:
Կամինսկու գնահատականով, «դա անհիմն եւ անօրինական գործունեություն էր»:
