Երեւանի Կարապետյան փողոցի տներից մեկում, այսօր վաղ առավոտյան քույր եւ եղբոր սպանության հեղինակը, ըստ NEWS.am-ի տեղեկությունների, սպանված 29-ամյա Շողիկ Ա.-ի նախկին ընկերն է: Նա նախկինում դատապարտված է եղել մարմնական վնասվածք հասցնելու համար:

Այս առնչությամբ, ոստիկանությունից NEWS.am-ին հայտնեցին, որ մայիսի 13-ին, ժամը 9-ին, ոստիկանության Մաշտոցի բաժնում ահազանգ է ստացվել, որ Երևանի Կարապետյան փողոցի 30 ա հասցեում վիճաբանություն է։

Մեկնած օպերատիվ խումբը նշված հասցեում հայտնաբերել է նշված տան բնակիչ, 29-ամյա Շողիկ Արմենակյանի դիակը՝ կտրած-ծակած գործիքի հասցրած հետքերով։

Պարզվել է, որ կտրած-ծակած վերքերով հիվանդանոց են տեղափոխել Համլետ Արմենակյանին եւ 26-ամյա Շավարշ Արմենակյանին, որտեղ վերջինս գիտակցության չգալով մահացել է։

Տան բակում հայտնաբերվել է արյան հետքերով խոհանոցային դանակ: Ձեռնարկված օպերատիվ հետախուզական միջոցառումներով պարզվել է կատարողի ինքնությունը, որին հայտնաբերելու ուղղությամբ տարվում են համապատասխան միջոցառումներ։

Քննչական կոմիտեի մամուլի ծառայությունից էլ NEWS.am-ին հայտնեցին, որ դեպքի առթիվ հարուցվել է քրեական գործ Քրեական օրենսգրքի 104-րդ հոդվածի հատկանիշներով:

Կատարվում է նախաքննություն։