Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանn այսօր՝ մայիսի 14-ին, բավարարել է ԱԺ պատգամավոր Գուրգեն Արսենյանի որդու` 20-ամյա Գուրգենի նկատմամբ որպես խափանման միջոց երկամսյա կալանքն ընտրելու նախաքննական մարմնի միջնորդությունը: Այս մասին NEWS.am-ը տեղեկացավ ՀՀ Քննչական կոմիտեի մամուլի ծառայությունից:
Դռնփակ դատական նիստը անցկացրել է դատավոր Արմեն Բեկթաշյանը:
Նշենք, որ Գուրգեն Արսենյանի տղան կասկածվում է խուլիգանություն կատարելու մեջ: Նրան մեղադրանք է առաջադրվել Քրեական օրենսգրքի 258 հոդվածի 4-րդ մասով՝ Խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով եւ զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաեւ ուրիշի գույքը ոչնչացնելով կամ վնասելով:
