Եղեգնաձոր քաղաքի Երեւանյան խճուղու ճամփեզրին գտնվող նախկին ավտոկայանի տարածքում մայիսի 15-ի գիշերը տեղի ունեցած վիճաբանության ժամանակ տեղի ունեցած դանակահարության հետեւանքով մահացել է 25-ամյա Սամվել Հովակիմյանը: Ինչպես NEWS.am-ը տեղեկանում է ոստիկանության մամուլի ծառայությունից, մայիսի 15-ին, ժամը 23.15-ին, հիվանդանոցից ոստիկանության Եղեգնաձորի բաժնում հաղորդում է ստացվել, որ բուժօգնության են դիմել 26-ամյա Սուրիկ Հ.-ն`« որովայնի թափանցող վերք, ստամոքսի վնասվածք» ախտորոշմամբ, 23- Լյուդվիգ Գ.-ն`« կրծքավանդակի աջ կեսի չթափանցող կույր վերք» ախտորոշմամբ եւ« կրծքավանդակի ձախ հատվածի թափանցող վերք» ախտորոշմամբ` 25-ամյա Սամվել Հովակիմյանը, ով հիվանդանոցում, գիտակցության չգալով, մահացել է:
Նույն օրը ոստիկանություն հաղորդում է ստացվել, որ ժամը 23:55-ին« որովայնի շրջանում դանակահարված վերք» ախտորոշմամբ հիվանդանոց է դիմել 25-ամյա Էդգար Բ.-ն, այնուհետեւ հաղորդում է ստացվել, որ մայիսի 16-ին, ժամը 01.30-ին «գլխի պատռված, նստատեղի ծակած կտրած վերքեր» ախտորոշմամբ բուժօգնության է դիմել նաեւ 30-ամյա Արթուր Բ.-ն:
Պարզվել է, որ Էդգար Բ.-ն եւ Արթուր Բ.-ն մարմնական վնասվածքները ստացել են մայիսի 15-ին, ժամը 23-ի սահմաններում, Եղեգնաձոր քաղաքի Երեւանյան խճուղու ճամփեզրին գտնվող նախկին ավտոկայանի տարածքում, վիճաբանության ժամանակ, որին մասնակից են եղել նաեւ Սուրիկ Հ.-ն, Լյուդվիգ Գ.-ն, 45-ամյա Հովիկ Հ.-ն եւ Սամվել Հովակիմյանը:
Հովիկ Հ.-ն ստացել է աջ ազդրի կտրած վերք, սակայն հիվանդանոց չի դիմել:
Հանգամանքները պարզվում են:
Կատարվում է քննություն: