ԱՄՆ հայ դատի հանձնախմբի գործադիր տնօրեն Արամ Համբարյանը մայիսի 16-ին Վիեննայում Հայաստանի եւ Ադրբեջանի նախագահների մասնակցությամբ հանդիպումից հետո հանդես է եկել հետեւյալ մեկնաբանությամբ։
«Նախագահ Սարգսյանի եւ Իլհամ Ալիեւի այսօրվա հանդիպման արդյունքում ղարաբաղյան հակամարտության գոտում հրադադարի ռեժիմի խախտման հետաքննության մեխանիզմներ ներդնելը հեռանկարային նախանշան է, որ միջազգային հանրությունը Բաքվին զսպելուց տարիներ անց կարող է նշանակալի քայլեր ձեռնարկել Արցախի եւ Հայաստանի դեմ Ադրբեջանի աճող ագրեսիան զսպելու համար։
Իհարկե այդ պայմանավորվածությունների իրականացման բանալին ԵԱՀԿ Մինսկի խմբի եւ միջազգային հանրության պատրաստակամությունն է հստակ եւ միանշանակ դատապարտել Ադրբեջանի կողմից այդ միջոցներին խոչընդոտելը։ Ադրբեջանի շարունակական խախտումների ու բռնության էսկալացիայի նկատմամբ ԵԱՀԿ արհեստական անհասցեական եւ հակակառուցողական դիրքորոշումը միայն նպաստեց նախագահ Ալիևի ռազմաշունչ հռետորաբանությանը ու խրախուսեց նրա կողմից պատերազմական գործողությունների վերսկումը: Հուսանք, որ կեղծ հավասարության այս ձախողված քաղաքականությանը Վիեննայի այս հանդիպումով վերջ կտրվի»։